BRUSELAS – E enviado speshal pa e islanan BES, Edison Rijna, a enfatisá durante e aperturá di e Climate Finance Forum (CFF) na Bruséls, e urgensia di akseso na finansia pa dil ku konsekuenshanan di kambio di klima. 

Rijna a mustra riba e vulnerabilidat di islanan chikí, alehá, manera Bonaire, St. Eustatius i Saba pa e konsekensianan di kambiamentu klimátiko, i a hasi un apelashon riba un esfuerso komún pa logra oportunidatnan nobo pa financiamientu.

E evento di 5 dia, organizado pa e Green Overseas (GO) Program, ta trese huntu más ku 130 stakeholder, inkluyendo representante di EU, UK i nan OCT-nan (Overseas Countries and Territories), pa eksplorá mekanismonan nobo pa finansiá pa proyekto dirigí na sostenibilidat. 

Den su spich, Rijna a suprayá e importansia di akshon komun pa haña solushonnan: “E momentu aki ta crusial. Nos mester traha huntu pa dil ku e obstákulonan i logra e ku nos komunidatnan tin mester”. 

Akseso

CFF tin komo meta pa duna akseso na finansiamentu klimátiko pa OCT-nan, ku ta den promé linea pa dil ku kambionan di klima, pero ku regularmente ta enfrentá opstákulonan pa yega na programanan di finansiamentu internashonal.