WILLEMSTAD – Djasabra a hinka na Sombeke na Oost-Vlaamse Waasmunster e muhé Belgikano ku djes aña pasá a kita bida di su dos yunan muhé ohochi den hotèl Marriott.

Sophie V. tabata na kas djasabra anochi ora ku den kareda di 8’or a bati na su porta. Segun informashon di Nieuwsblad.be  e outor a saka un kuchú i mésora a hinka e muhé den su barika, despues di kual akto el a hui bai riba  un motosaikel. Sophie V. aktualmente ta interná den hòspital i ta for di peliger.

E víktima no ta un deskonosí pa Hustisia. Nèt djes aña pasá el a bini den notisia ora ku el a asesiná su dos yunan muhé ohochi, Amélie i Alexine, ku e tempu ei tabatin 6 aña. A haña e dos rumannan muhé ohochi morto den baño di nan kamber di hotèl na Hotèl Marriott na Kòrsou i despues a resultá ku nan a hoga den ‘badkuip’.

Despues a haña e mama den laman bou di gritamentu. Riba konseho di un sikiatro el a keda interná den Klínika Capriles i despues el a regresá Bélgika, kaminda a pon’é bou di tratamentu sikiátriko.

Despues di a keda interná pa añanan largu a sigui un fase di guia ambulante. Entretantu Sophie tin basta tempu bibá den Waasmunster.

No ta konosí si Sophie tabata konosé e outor. Segun hendenan e tata no tin akseso na informashon di paden e tata di e muchanan asesiná no tabatin nada di aber ku e insidente aki, ounke e asesinato a tuma lugá 23 di yüli 2022, eksáktamente 10 aña despues di e asesinato na Kòrsou riba 23 di yüli 2012.

Mientrastantu a detené un hòmber. Pasobra e insidente a tuma lugá eksáktamente djes aña despues di e dòbel asesinato, a sospechá  den promé instante su èks-esposo. Pero esaki tabatin un èksküs hèrmétiko. E ora ei a drenta un otro hòmber den pantaya ku e víktima tabatin un relashon kòrtiku kuné durante su estadia den e instituto sikiátriko.