WILLEMSTAD – Un kantidat di 1961 kandidato riba 22 skol na Kòrsou a kuminsá siman pasá òf ta kuminsá e siman aki ku nan èksamen sentral. VWO i HAVO a kuminsá riba 6 di mei, VSBO ta kuminsá awe ku e èksamen di Hulandes.

Durante mas ku tres siman e kandidatonan na Kòrsou ta pasa nan èksamennan pa disidí si nan a terminá nan periodo na vsbo, havo òf vwo ku éksito.

Kantidatnan

526 alumno di havo ta pasa èksamen e aña aki, lokual ta 54 mas ku aña pasá. Den vwo 143 kandidato ta pasa èksamen ku ta un bahada di 34 alumno kompará ku aña pasá.

Vsbo tin e aña aki 1292 kandidato pa èksamen, 43 ménos ku aña pasá. Den vsbo ta hasi distinshon den tres liña di enseñansa: PBL, enseñansa dirgí riba fishi ku 261 kandidato; PKL, enseñansa práktiko pa forma kader ku 355 alumno pa èksamen i TKL, enseñansa teorétiko pa forma kader ku 676 kandidato pa èksamen. Ta trata aki di djessinku skol.