Kralendijk, The Bottom, Saba, Oranjestad, St. Eustatius – Entrante 1^e di ougùstùs 2021, un tim di investigadó sientífiko lo permanesé un siman largu na Saba Bank pa hasi investigashon di e siklo di bida di tribon tintorero. E investigadónan sientífiko lo investigá e rutanan di migrashon, na unda i na kua momentu tribon tintorero ta reprodusí, di manera ku por protehá nan na forma mihó denter di e Santuario Karibe Hulandes Yarari Marine Mammal and Shark Sanctuary i tambe pafó di e área akí. Den e ekspedishon akí lo tin partisipashon di miembronan di Saba Conservation Foundation (SCF), Nature Foundation St. Maarten (NFSXM), St. Eustatius National Parks (STENAPA), STINAPA Bonaire, Aruba National Parks Foundation (FPNA), Dutch Caribbean Nature Alliance (DCNA) i World Wildlife Fund for Nature the Netherlands (WWF-NL).

Na 2016, Saba Conservation Foundation, Nature Foundation St. Maarten, i Sharks for Kids a djòin huntu komo partner di DCNA su proyekto “Save our Sharks” ku tabata haña fondo di parti di Nationale Postcode Loterij di Hulanda. For di e tempu ei, a kuminsá ehekutá markamentu ku transistor di satélite di tribon tintorero na Saba Bank i rònt di Sint Maarten. Dor di e investigashon akí, awe nos tin konosementu ku tribon tintorero den awanan di e region hulandes ta biaha rònt den e fondo di laman Karibe, anto ku mayoria di e tribonnan akí, ku tin un marka ta tribon muhé ku seksualmente ta madurá. Durante e próksimo ekspedishon e investigadónan tin komo meta, pa no solamente pone marka i sigui moveshon di mas tribon tintorero pa kontinuá mas aleu ku e investigashon di e siklo di bida, pero tambe nan lo midi si tin yu chikitu den barika di tintorero embarasá i tambe kon grandi e yuchinan den barika di e mama ta. Esaki lo yuda determiná si Saba Bank realmente ta un área kriadero pa tribon tintorero, kual ta un di metanan mayó di e ekspedishon.

E otro meta ta pa wak unda e tribonnan aki, ku ta krusa frontera di área, ta move bai, di manera ku ta haña mihó komprendementu di e importansia di e santuario Yarari Marine Mammal and Shark Sanctuary i protehá tambe otro áreanan geográfiko. A establesé Yarari Santuario riba 1^e di sèptèmber 2015 i su meta ta pa protehá mamífero marino, tribon, i chuchu rònt e awanan di Bonaire, Saba, i for di sèptèmber 2018, tambe Statia. Kolaborashon, entre no solamente e seis islanan di Hulanda Karibense, pero tambe entre e paisnan di e region amplio di Karibe komo totalidat, ta nesesario pa protehá i konservá e espesienan esensial akí i ekosistemanan. Pa e motibu akí resientemente a forma e Koalishon Karibense di Tribon (“Caribbean Shark Coalition”) pa kolaborá mihó ku otro den hinter e region Amplio Karibense.

Dia Mundial di Konservashon di Naturalesa, ku ta selebrá kada aña riba 28 di yüli, ta rekonosé ku un ambiente saludabel ta e fundeshi pa un sosiedat stabil i saludabel. Esaki ta inkluí un osean saludabel, ku indudablemente, ta dependé di tribon. Tribon ta e animal yagdónan grandi na tòp di e kadena alimentisio ku tin un papel importante den mantenshon di e balansa den e ekosistema marino. Tribon ta yuda mantené e populashon di e animalnan ku nan ta yag ariba saludabel dor di kome esunnan ku ta debil, miéntras ku nan tin un efekto di e manera akí riba distribushon di e populashon di e animalnan ku nan ta yag ariba, den e áreanan. Den un osean saludabel, tribon ta yuda pa mantené un populashon di piská stabil i koral ku kama di yerba di laman saludabel, loke ta importante pa peska i pa ekonomia di e islanan.

E Ekspedishon di Tribon Tintorero ku ta kai bou di kordinashon di DCNA i ta haña fondo generoso di WWF-NL pa medio di e Fondo pa Biodiversidat i Nationale Postcode Loterij di Hulanda. Pa mas informashon tokante e Ekspedishon di Tribon Tintorero Embarasá (“Pregnant Tiger Shark Expedition”), sigui e páginanan di e organisashonnan partisipante riba Facebook, Instagram or DCNA’s website (https://dcnanature.org/news/).

---

Lesa tambe:

• 
  Partnernan di CAO pa Islanan BES a topa pa deliberá riba desaroyo 
• 
  Prevení Zika, Dengue i Chikungunya
• 
  Organisashonnan Karibe Hulandes ta traha huntu pa preveni violensia kontra hende muhé
• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei