Lisse- Eksperto riba tereno di aviashon i èks direktor di departamento di aviashon di Kòrsou, Hans de Jong, den un editorial riba djadumingu ta skibi ku bulamentu ku avion eléktriko no ta bai yuda baha preis di pasashi sin mas.

De Jong ta bisa ku no ta e bulamentu ku avionan di awendia riba kombustibel klásiko ta e problema, sino e kantidat di impuesto i otro sobrekargonan ku ta imponé riba aerolínea i pasashi, tin e preisnan manera nan ta.

De Jong a hasi su komentarionan, reakshonando riba ponensianan di e asosiashon di aeropuertonan na e islanan di Karibe Hulandes DCCA. Den un artikulo resien, entre otro den e revista Luchtvaartnieuws, direktor di Aeropuerto di Aruba na nòmber di e asosiashon ta bisa ku ambishon lo mester ta ku un pasashi entre e islanan lo mester kosta no mas ku 100 dòler ida i buelta.

“Imposibel ku djies e bulamentu ku avion eléktriko lo trese esaki, si no ta tuma na konsiderashon e kantidat di impuesto i otro sobrekargonan ku ta eksistí, i ku ta kondusí na e preis manera e ta”, asina de Jong a opiná.

Mas impuesto

De Jong ta mustra riba e echo ku aeropuerto di Kòrsou a bolbe disidí di oumentá su ‘Passenger Facility Charge’ ku 3 dòlar pa bai Boneiru, i 5 dòler mas ora di bula bai Aruba òf St. Maarten. De Jong ta bisa ku ela keda asombrá kon fásil Konseho di Minister na Kòrsou a aprobá e hisamentu di tarifa aki, ku atrobe lo kondusí na un subida den preis di pasashi.

De Jong ta bisa ku tin diferente rapòrt ku a kompilá i ta mustra perfektamente bon na unda e problema ta sinta. Tambe e ta mustra riba e rapòrt di komishon bou di liderazgo di Peter Hartman ku a bin ku sugerensia pa baha e gastu di pasashi un poko pa residente di e isla. Pero, nada mashá no ta wòrdu hasí ku e análisis i sugerensianan aki, asina de Jong ta bisa.

Tanten ku no kuminsá rekonsiderá sierto impuesto i sobrekargonan aktual, introdukshon di avionnan eléktriko lo no kambia nada na e situashon, asina De Jong ta konkluí.