E eksperto pa loke ta trata desaroyo turístiko, profesor Robertico Croes, a publiká un buki nobo tokante su konklushonan pa ròl di turismo den desaroyo di islanan chiktu. 

Croes ta un di e ekspertonan tambe ku a yuda pa skibi e plan stratégiko di turismo pa Boneiru. 

Den su buki ‘Small Island and Small Destination Tourism’ Croes ta kompará e desaroyo turístiko entre Kòrsou ku Aruba. Croes ta konkluí, entre otro, ku pa medio di un enfoke kla riba turismo, ekonomianan por krese mas rápido e ta sòru tambe pa un entrada pa kabes mas grandi, kompará ku islanan ku ta hasi esaki ménos fuertemente.

Croes ta un profesor na University of Central Florida, kaminda e ta spesialisá den konosimentu tokante desaroyo turístiko. Aparte di Boneiru, Croes aktualmente ta yudando gobièrnu di Saba pa yega na un plan strategiko di turismo tambe.