WILLEMSTAD –  Djasabra 10 di dezèmber ta inougurá Lus riba Nanzi, un eksposishon di grupo ku ta dediká na Kompa Nanzi, un personahe legendario di literatura oral di Kòrsou. E apertura ta for di 10.30 na Landhuis Bloemhof. E kantina literario di Bloemhof tambe ta duna atenshon na e personahe maravioso aki riba 15 di dezèmber.

Pa e eksposishon riba e tema aki Bloemhof a pidi artistanan pa personifiká den un obra di arte loke Nanzi ta nifiká pa nan. Djesseis artista a duna oido na esaki, entre kua Annemieke Dicke, Giovanni Abath i Tayenne Winklaar. E artistanan aki a kontribuí ku kuadro, instalashon i obranan di arte di téknika miksto.

Bloemhof ta yama e eksposishon un eksposishon di kresemente, kompletamente den e karákter di Kompa Nanzi ku ta un personahe difísil pa pronostiká. Si tin artista ku ainda ta haña inspirashon, nan por trese nan kontribushon.

Mondi Mágiko i Kafetaria Literario

E idea pa tira lus riba Kompa Nanzi a nase for di 2020, pero pa motibu di diferente lockdown i toke de keda Bloemhof mester a posponé e plannan kada biaha.

Landhuis Bloemhof ke sera e aña riba un manera agradabel ku tur hende na Kòrsou. Banda di e eksposishon ta bai sende tambe e lusnan spektakular den kurá. For di mañan, 8 di dezèmber, Mondi Mágiko ta bèk ku e edishon di Nanzi. Méskos ku na 2019 e diseño ta den man di Giovanni Abath ku e tim entusiasmá di Kara Productions. Mondi Mágiko ta habrí pa públiko tur djabièrnè, djasabra i djadumingu di 6’or di atardi pa 10’or di anochi.

E eksposishon Lus riba Nanzi ta dura te ku 7 di yanüari 2023