WILLEMSTAD – Awe ta nèt djes aña pasá ku a tira e konosido polítiko Helmin Wiels mata riba e playa di Marie Pampoen. Pa e akto ei Elvis Kuwas ta sintando un kastigu di bida largu. Djes aña despues e tin duele di su desishon, Vigilante, ku a papia kuné, ta skirbi.

Riba e dia ei Kuwas a sali for di su kas na Mahuma ku un flané riba su lomba direkshon di Koraal Specht. Einan e tabata hunga dominó ku su amigunan. Mas lat a drenta un mensahe riba su telefon di e defuntu Luigi Florentina, alias Pretu. El a puntra Kuwas si ‘e kier a kome’. Nan lo a topa otro den su garashi. Mas lat e atardi ei Kòrsou a tende ku Helmin Wiels a muri a konsekuensia di un atentado riba su bida. Sobrá di e historia ta konosí.

Na luna di mei 2013 ta detené Kuwas i for di e tempu ei e ta será. El a atmití su kulpabilidat i a sentensi’é te na kasashon. Komo mucha Kuwas no tabatain un bida fásil. Ku su 12 aña ya e tabata metí den ladronisia i algun aña despues e tabata den un sentro di detenshon hubenil despues ku a atrapá un amigu di dje i e mester a karga e kulpa. Un parti di su bida ku no por kita nunka mas. E mésun kos ta konta pa e kaso di Helmin Wiels.

“Te ku dia di awe esaki ta hasimi doló”, el a deklará na Vigilante ayera. Elvis ta na Hulanda i ta konta ku e asesinato riba Wiels a kambia su bida kompletamente i ku e tin duele di loke a sosodé. Niun hende no ke kere, pero Elvis Kuwas no tabata sa djes aña pasá ku el a tira Helmin Wiels mata. A bis’é ku e hòmber en kestion lo bai firma un dokumentu di moda ku otro hende lo a ‘kologa’. Na e momentu ei Kuwas no tabata sa ta ken ta Helmin Wiels.

Tur santu dia Kuwas ta kòrda riba e dia ei i mas aun ora ku e fecha ta serkando i no por sak’é for di su mente. Den su sekshon den prizòn nan ta hunga pul i futbol. E tin kontakto ku su famia i no ta embolbí ku su bida di antes mas. E tin un mensahe pa tur hóben pa bai skol, hasi deporte i tenebo leu for di kriminalidat, ‘pasobra bo no ta gana nada ku kriminalidat’. Baho mundo ta trese hopi tristesa i doló. “Bo no mester wak sèn so, pasobra riba término largu bo no ta logra nada.”