Kralendijk- Pa basta tempu kaba tin sierto tenshon ta reina den Selibon, kaminda ku prinsipalmente e empleadonan ta malkontentu tokante e maneho di entre otro direktor di Selibon, Rudsel Leito.

E malkontentu a afektá tambe e relashon di e empleadonan ku nan sindikato, ku tabata ABVO te na e momentunan aki. Mientrastantu gran mayoria di e empleadonan di Selibon a entregá nan retiro na ABVO, pa despues a afiliá na AFBW. AFBW, na su turno, ta pidi gerensia di Selibon pa wòrdu rekonosé komo e sindikato ku ta representá e empleadonan di e organisashon.

AFBW a manda un lista di tur e trahadónan pa mediadó di gobièrnu pa mustra ku en berdat nan ta representá mayoria di e trahadónan den e empresa. Segun AFBW ta trata di 43 empleado ku ya a afiliá na e sindikato, mientras ku 34 empleado a tuma nan retiro for di ABVO.

Inkietut

AFBW den un komunikado a duna algu mas di splikashon tokante e situation ku a surgi. “Komo un sindikato ku ta para pa e klase trahadó, a mira ku ta di bèrdat tin inkietut serka e trahadónan. Komo un sindikato responsabel, bo no por laga e trahadó nan aki desampará. Si AFBW no tuma nan, nan lo bai otro sindikato tòch, pasombra e mandato di nan tabata kla ku nan no ke ta ku ABVO mas”, asina AFBW a skibi.

Mientrastantu AFBW ta en espera di reakshon di parti di gerensia di Selibon.