WILLEMSTAD – A deklará e empresa di hunga plaka Rusiano 1XBet  bankarota i e tin miones di debe. Sinembargo e ta aktivo ainda for di Kòrsou.

Segun un kaso ku a entamá kontra di e empresa di hunga plaka ònlain kontroversial, 1XBet debe miones di Euro na impuesto ku no ta pagá i ganashi.

Stichting Vertegenwoordiging van Slachtoffers van Online Gaming (SBGOK), ku ta representá un grupo di hungadó di wega di plaka, ku ta pretendé ku no a paga nan, a entamá e kaso kontra 1XBet. 

Dokumentunan legal ta mustra ku korte di Kòrsou a dikta sentensiá aña pasá pa promé biaha kontra e empresa prinsipal 1XCorp. 6 di mei un korte di Kòrsou a rechasá un apelashon i a deklará 1XBet bankarota na luna di yüni.

A apuntá abogado Arend Winter pa guia e prosedura di bankarota, pero for di dokumentunan legal ta sali na kla ku e empresa di wega di plaka ta nenga di koperá.

“Ta evitá preguntanan i no ta kumpli ku promesanan hasí”, de Winter ta skirbi den e dokumentu hudisial. Serka e atministradó hudisial no por kita e impreshon ku por papia di resistensia boluntario. E sitionan di hunga plaka di 1XBet a kambia di doño vários biaha kaba for di momentu di e bankarota, mientras ku na tur momentu ta menshoná 1XCorp ainda komo ‘operadó’.

Segun Arend de Winter un kontrato di lisensia tabata e úniko dokumentashon ku el a haña di 1XBet. E bankarota a keda limitá te Kòrsou, pero segun e dokumentunan pa motibu di  e struktura kompliká di e empresa 1XBet e empresa tin ni sikiera un kuenta di banko riba e isla.