KRALENDIJK- Mayoría negoshi turístiko a rekuperá di e situashon pésimo ku e pandemia di Covid-19 a trese kuné. Gran mayoría di negoshi den e sektor aki, pa medio di un enkuesta bou di miembresia di BONHATA ta indiká ku den hopi kaso ya a yega e mesun nivel di benta ku tabata e kaso promé ku aña 2020.

Den sierto kaso, asta ta surpasando e nivel di benta di e situashon nèt promé ku Covid. Sin embargo, no ta den tur sentido e negoshinan aki a rekuperá. 

Personal

Riba tereno di personal, por ehèmpel,  42% di e miembronan ta indiká ku nan no a rekuperá ainda i kasi un kuart (23%) ta indiká ku ainda no por ofresé e mesun kalidat di servisio manera promé. Pa loke ta trata e promé parti di desèmber pa averahe tabata tin un okupashon di 74% pa loke ta trata e hotèlnan. 

Sin embargo, pa loke ta trata kalidat di servisio, esaki te ainda ta mira su mes afektá pa falta di (sufisiente) empleado. Skarsedat di empleado a bira un problema basta grandi riba merkado di Boneiru, en partikular den sektor di turismo.