Kralendijk – Entidat Públiko Boneiru i Bonaire Properties NV konhuntamente ta bai investigá e posibilidat pa bai desaroyá e anterior plantashi Bolivia i konbertié den un finka kaminda tin espasio pa naturalesa, biba i traha. Pa esaki ámbos partido a firma un akuerdo di intenshon.

Bonaire Properties, doño di e área, ke desaroyá loke nan ta deskribí komo ‘un parti chikitu’ pa konstrukshon di bibienda, agrikultura , hortikultura i ekoturismo. Den e 90% ku ta sobra lo rekuperá naturalesa kaminda esaki ta nesesario i poné bou di maneho profeshonal. E puntonan di salida di e plan ta kuadra ku maneho di Entidat Públiko Boneiru. Deseo di Kolegio Ehekutivo ta pa – ku konservashon di naturalesa i kultura – promové  prosperidat i bienestar di poblashon lokal pa medio di krea sufisiente empleo, bibienda pagabel i mas produkshon lokal di bèrdura i fruta.

Konsulta

Den e aña tras di lomba riba nivel atministrativo a hiba konsulta intensivo entre Entidat Públiko Boneiru i Bonaire Properties, entre otro pa inventarisá kua  legislashon i regulashon mester kumpli kuné. Esaki a kondusí na un vishon di desaroyo urbano i di paisahe ku lo keda prosesá durante e lunanan binidero bou di supervishon di un grupo di direkshon konhunto. Espektativa ta ku den e simannan binidero por duna un presentashon na Konseho Insular, kaminda lo presentá un plan preliminar di desaroyo. Despues di esei lo duna informashon na un públiko mas amplio.

“A base di e dokumentashon i e kòmbersashonnan a bira bon kla pa nos ku no solamente ta atendé sumamente profeshonal ku e proyekto, pero tambe ku nan ta anda ku rèspèt pa Boneiru su interesnan. E último akí ta determinante pa nos wisio final”, asina gezaghèber Edison Rijna a bisa. 

Direktor di Bonaire Properties Mieke Breemhaar ta haña ku a neglishá Bolivia: ”Pa hopi dékada kaba a deskuidá Bolivia. Naturalesa ta menasá di bai kompletamente pèrdí pa motibu di kabritu ku ta kome e vegetashon i pa motibu di eroshon. Pa medio di desaroyo di un parti chikitu por salba e bunita pida Boneiru akí i na mes momentu nos ta kontribuí na solushon di algun problema agudo, manera eskases di bibienda pagabel, un oferta turístiko mas diverso, enseñansa i redukshon di e dependensia di importashon di produktonan di agrikultura i hortikultura. Nos tin tur konfiansa ku huntu ku Entidat Públiko Boneiru nos ta yega na un plan bon balansá”.

Diputado

Diputadonan Kroon, Thielman i Den Heyer tambe ta mustra nan mes positivo pa ku e estudio. Nan ta deskribí e plannan manera ‘balansá’.