Kralendijk– Segun un komunikado di Kolegio Ehekutivo, entidat públiko Boneiru ta determiná pa kaba ku plèstik di un solo uso, o sea deseschabel.

Ya na òktober 2018 a akseptá un ordenansa den Konseho Insular pa bai prohibí e tipo de plèstik aki. E meta ta pa redusí uso di plèstik desechabel pa medio di un prohibishon di un kantidat di produkto ku ta mas tantu usá, na benefisio di nos medio ambiente, salú di nos komunidat i un di e entradanan di mas grandi di Boneiru: turismo.

Representante di Ministerio di Infrastruktura i Maneho di Awa, señora S. van Veldhoven-van der Meer i diputado señor P.J. Kroon, komo representante di Entidat Públiko Boneiru, a firma un deklarashon di intenshon komo promé paso pa ehekutá e moshon di Konseho Insular.

“Na Boneiru ta importá un gran kantidat di plèstik di un solo uso ku despues di uso ta resultá riba kaya i den nos awanan. Asina aki e ta bira un menasa pa nos medioambiente i e koralnan”, asina un relato di prensa ta bisa.

Kolegio Ehekutivo ta bisa ku nan ta konvensí i alabes tin konfiansa ku entrega di e proposishon pa eliminá e plèstik di un solo uso ta un paso importante den drechamentu di un ambiente di biba salu pa tur habitante i fortalesé un imágen duradero i ku esei tambe e ekonomia di nos isla.