KRALENDIJK – Dia 28 di yüni último Qredits, den presensia di Orco Bank i MBO Bonaire, a hasi entrega di sertifikado na 8 studiante di MBO Boneiru ku a finalisá eksitosamente e kurso di ‘BeYourOwnBoss’. E futuro empresarionan den desaroyo a risibí nan sertifikadonan ku hopi orguyo. Qredits Boneiru ke felisitá e partisipantenan aki un bes mas pa a kompletá e kurso ku èksito i ta spera ku nan lo sigui mas kurso pa sigui amplia nan konosementu i desaroyá nan abilidatnan riba e area di emprendementu.

‘BeYourOwnBoss’ ta un inisiativa di Qredits introdusí na 2021 i tin komo meta pa stimulá emprendementu bou di studiantenan. Durante e programa di 8 siman e studiantenan a haña e oportunidat pa kuminsá desaroyá nan abilidatnan empresarial i amplia nan konosementu tokante empredementu bou di guia di e dosente prinsipal, Daimandra Frans, kende ta un Qredits Coach i tambe un empresario. Diferente topiko tokante emprendementu a keda tratá, manera trahamentu di un análisis di konkurensha i kon pa duna kontenido na un idea empresarial hasiendo uzo di un ‘Business Model Canvas’. Kámara di Komèrsio i Industria Boneiru i Orco Bank tambe a fasilitá seshon nan tokante formanan huridiko i maneho di sen i uzo di produktonan bankario pa e proposito aki. Na final di e programa e studiantenan a duna un tremendo presentashon di nan idea den forma di un ‘pitch’.

“Semper mi tabata tin kuriosidat pa emprendementu i mi ta hopi kontentu di por a partisipá na ‘BeYourOwnBoss’ paso ela yuda mi sa kiko e ta kome i bebe. Awor mi sa kiko mi tin ku tene kuenta kune i kon mi tin ku prepara mi mes pa mi lanta mi propio negoshi.” tabata palabranan di Denzl Statie, un di e studiantenan di MBO ku a finalisá e trayekto. Dosente Daimandra Frans di su parti a ekspresá kon orguyoso e ta di mira e esfuerso di kada studiante i kon nan a uza tur e konosementu risibí pa presentá nan proposishon di negoshi na un manera hopi tremendo. Milagros Blanken, Branch Manager di Qredits Boneiru, a gradisí e studiantenan pa nan empeño i a motivá nan pa nan sigui mas kurso pa kaba di duna kontenido na nan idea i sigui desaroyá nan mes komo empresario. “Nos ta spera di por selebrá aki un par di aña e inisio di e boso propio empresanan” ela finalisá kune.

MBO Boneiru su enfoke ta pa duna studiantenan kurioso pa sa kiko emprendememtu ta enserá e oportunidat pa sa mas i desaroyá nan abilidatnan empresarial. E programa ‘BeYourOwnBoss’ ku Qredits ta fasilitá a prueba di por aportá na e realisashon di e meta aki. Pa e motibu aki MBO Boneiru lo sigui ofresé su studiantenan e oportunidat pa ‘BeYourOwnBoss’. Qredits Boneiru tambe ta gradisí Orco Bank komo e partner prinsipal di e programa ‘BeYourOwnBoss’ pa su sosten i pa kere den e importansia di fomentá e spiritu empresarial den e hoben nan.