KRALEDNIJK- E siman akí e kampaña di informashon tokante e elekshonnan di 15 di mart binidero pa Konseho Insular i Kolegio Elektoral ta ranka sali. Ku e slogan ‘Mi ta vota! Abo tambe tòg?’ i riba e imágen un persona ku derecho di voto, nos ta informá tur hende tokante na unda, ki dia, dikon i kon pa vota dia 15 di mart 2023.

 Pa medio di komuniká den kuater idioma: hulandes, papiamentu, ingles i spañó, nos ta purba alkansá mas tantu persona ku derecho di voto posibel na nos isla.

Riba e wèpsait www.boneirutavota.com i e página di facebook BoneiruTaVota por haña mas informashon tokante e elekshonnan, esta na unda, ki dia, dikon i kon pa vota. Informashon spesífiko adishonal tokante por ehèmpel kiko bo tin ku hasi ora bo no a risibí bo karchi di vota dia 1 di mart, kon un persona ku derecho di voto por apoderá un otro hende pa vota p’e, i ku kumpramentu òf bendementu di voto ta kastigabel, nos ta publiká akinan.

Informá

Entidat Públiko Boneiru ta responsabel pa informá personanan ku derecho di voto tokante elekshon na Boneiru. Esaki ta kana pues paralelo ku e kampaña di RCN pa Boneiru, Sint Eustatius i Saba. E kampaña di Entidat Públiko Boneiru ta den kuater idioma i ta sinkronisá ku e kampaña di RCN, di manera ku nan ta fortifiká otro.