KRALENDIJK – E proyekto “Di Boneiru pa Boneiru” a wòrdu aprobá pa e Erfgoeddeal, un programa ku ta sostené inisiativanan kaminda preservashon di herensia ta kombiná ku desaroyonan sostenibel manera adaptashon klimátiko i transishon di energia.

Boneiru a haña aprobashon pa su petishon durante e 8ste ronda di e Erfgoeddeal e aña aki. E proyekto ta enfoká riba e mehorashon i sostenibilidat di kasnan ku balor kultural-históriko na Rincon, e pueblo mas bieu di Boneiru. Aparte di restorashon di kasnan, e proyekto ta inkluí un re-diseño adaptivo pa e espasio públiko, ku atenshon pa plantamentu, akohida pa awa di yobe, i aspekto ekológiko manera e kurso di awa den e área.

E meta ta pa no solamente redusí e falta di kas, pero tambe pa mehorá e kalidat di bida i preservá e herensia kultural di Boneiru.

Presupuesto

Ku un presupuesto di mas ku 2.1 mion dóler, e proyekto ta pone un paso importante den e restaurashon i preservashon di herensia di Boneiru, den linia ku e bista di e Bestuurscollege manera ta stipulá den e Bestuursprogramma Boneiru 2024.