Kralendijk- E kompania hulandes Europarcs ta bai konstruí un hotèl nobo riba un parti di e tereno kaminda Sunset Beach Hotel i antes Hotel Bonaire tabata situá. E hotèl nobo, ku por sierto ta bai karga nòmber Sunset Beach Resort, lo bai wòrdu konstruí nèt entre Eden Beach Hotel i Chogogo Resort/Tui Time-to-Smile Resort.

Eden Beach tabata tin e promé opshon riba e tereno konserní i a asta firma un akuerdo ku Bonaire Overheidsgebouwen (BOG) algun aña pasá pa kuminsa ku ekspanshon di e hotèl presente. Sinembargo, Eden Beach no a keda kla na tempu ku e finanasiamentu pa realisá esaki.

Segun direktor di EuroParcs, Wim Vos, e resort nobo lo konsistí di 106 kamber i apartamento luhoso, i lo tin un hardin bunita mei-mei. E resort tin un akseso direkto na bich.

Resort Bonaire

E hotèl nobo ta di mesun doño ku Resort Bonaire na Belnem, ku pa algun aña ta operashonal kaba. Segun doñonan di EuroParcs, Boneiru a resultá un ‘hit’ pa loke ta trata interes di hende na hulanda. EuroParcs ta kere firmemente ku e turismo di Boneiru, despues di e krisis di Corona, lo bolbe kuminsá krese rápidamente, meskos ku tabata e kaso den añanan tras di lomba.

E resort no ta solmante destiná pa turismo: E apartamentonan ta wòrdu bendé tambe nan partidonan interesá komo invershon.