WILLEMSTAD – Na aprel 2021 a pasa e portfolio di Girobank pa GI-RO Settlement Holding BV (GSH). Banko Sentral di Kòrsou i Sint Maarten (CBCS) i ministerio di Finansas a instituí GSH pa yega na un likidashon kontrolá di Girobank. GSH ta konsistí di un grupo chikitu di profeshonalnan di banko i profeshonalnan finansiero. E tarea di GSH ta di paga e depositarionan i pago di e fiansa ku pais Kòrsou a pone disponibel pa GSH.

Na momentu ku GSH a kaba di paga e debe na gobièrnu (un fiansa ku gobièrnu a pone disponibel pa GSH  a base di un fiansa ku gobièrnu a sera ku Hulanda), lo usa e sobrá di e montantenan ku a kobra pa paga e depositarionan ku no a risibí nan depósito ainda kompleto. Tin 30 depositario ku montantenan mas grandi ku 1.2 mion, ku probablemente por sufri daño finansiero grandi, basá riba e modelo ku CBCS a skohe pa finalisá e proseso di e areglo di emergensia. Ta trata di fondonan di penshun, direktivanan di skol, institushonnan gubernamental i organisashonnan finansiero.

E areglo entre GSH i gobièrnu tin algun punto di atenshon ku mester evaluá. Ounke ku gobièrnu tabatin solamente un interes minoritario den Girobank, ta gobièrnu mes mester karga ku e gastunan di e solushon ku tin pensá. A base di e areglo ku a apliká e debe di gobièrnu a subi ku 437 mion florin. E debe aki no ta un konsekuensia dirèkt di maneho di gobièrnu i p’esei mester buska tambe un solushon adekuá.

Fondo di Penshun general di Kòrsou (APC) tin tres ròl den e proseso, lokualnan ta (1) anterior akshonista di Girobank, (2) depositario i (3) doño di Banko APC, CHB i PSB. Kontrali na depositarionan ku un depósito di 1.2 mion florin, APC no a risibí e montante kompleto ainda di su depósito.  Esei ta hasi APC un sosio kolaboradó importante i ta pa e motibu ei ministerio di Finansas i e representantenan di GSH i APC a sinta resientemente na mesa pa yega na posibel solushonnan pa e puntonan di atenshon.

Promé ku yega na un desishon ta tuma e diferente opshonnan i alternativanan den konsiderashon. Di akuerdo ku lei e interes di e depositarionan mester ta e meta prinsipal. Pais Kòrsou, ku a tuma e responsabilidat di e gastunan di e solushon riba dje, mester ehekutá  esaki di tal manera ku e gastunan ta keda minimal pa tantu gobièrnu komo e pueblo di Kòrsou.