KRALENDIJK- Ayera tardi pa 5 ‘or di atardi, e kompania di aviashon EZ Air a ehekutá un promé buelo komersial pa Boneiru ku su avion Saab340B.

Djaweps e kompania a risibí, for di man di minister Charles Cooper, e sertifikashon pa uso di e avion nobo. E introdukshon di e avionnan nobo ta nifiká un era nobo pa EZ Air, pero tambe pasaheronan ku ta biahando for Boneiru pa Aruba i Kòrsou, pero tambe pa Colombia.

E avion ta konta ku 34 stoel, i ta kasi dòbel mas grandi ku e avionnan ku EZ Air i tambe Divi Divi Air ta usando riba e ruta, despues ku e kompania Insel Air a bati bankarota.

Stiwardès

Dor di su grandura, e avion nobo tin tambe stiwart ku stewardès na bordo, algu ku no ta nesesario ku avion ku ta karga ménos ku 20 hende.

Dentro di poko EZ Air ta sperando un di dos avion di marka Saab. Ta bai usa e avionnan Saab banda di e avionnan eksistente di EZ Air, ku ta e Beechcraft 1900D.