Kralendijk/Willemstad- Riba djasabra EZ Air a ehekutá un promé buelo pa aeropuerto Jose Maria Cordoba di Medellin ku su avion nobo, e Saab 340B. E buelo a tuma lugá den kuadro di sertifikashon di e avion aki pa Curaçao Civil Aviation Authorities (CCAA).

E avion a wòrdu piloteá entre otro pa Capitan Franklin Antoin i Ruben Ramos, ku ta un kapitan ku hopi aña di eksperensia ku e tipo di avion aki. Despues di a keda un ratu na tera, e avion a lanta buelo bèk pa Kòrsou, na unda ela baha lat den atardi.

Aktualmente EZ Air ta ehekutando diferente buelo di prueba, entre otro pa St. Eustatius, St. Maarten, Barranquilla i Medellin.

E aerolínea pronto ta spera di risibí un di dos avion di e modèl Saab.

Satisfecho

Direktor di EZ Air, René Winkel a mustra su mes satisfecho ku e proseso. “Nos lo ke tuma e avion den servisio komersial mas lihé posibel, pero e kosnan aki ta tuma nan tempu”, asina Winkel a splika. Winkel a bisa ku e proseso huntu ku CCAA ta kanando na satisfakshon.

Aktualmente tin vários piloto di EZ Air ta risibiendo treinen riba e avion nobo. Tin vários grupo di piloto a hasi treinen den ‘simulator’ kaba, i despues ta sigui riba e buelonan di prueba ku ta ehekutandá pa vários destinashon den region.