KRALENDIJK/WILLEMSTAD- Riba djaweps a baha un avion mas di e tipo Saab 340 mas na aeropuerto di Kòrsou ku number di EZ Air. Sinembargo, por nota ku e avion aki ta karga koló diferente ku no ta parse esun di kustumber di EZ Air. 

Direktor di EZ Air, René Winkel a splika ku e di tres avion ku a bin primeramente ta bai sirbi komo backup pa e otro dos Saabnan ku tei kaba. “Pa stabilidat di nos operashon, nos tin mester di un avion adishonal pa kai aden si un di e dos otro avionnan tin un problema tékniko”. 

Winkel a sigui splika ku di e forma aki por evitá mucho kambio den e skema di e buelonan, ora avion tin problema tekniko òf mester bai den mantenshon planeá. Simebargo, no ta sigur ahinda ku e avion spesífiko aki tei pa keda. “Tanten ku nos ta sperando pa nos avionnan mas grandi, e Saab 2000-nan yega, nos mester di e avion adishonal aki sigur. Den un fase mas laat nos lo evaluá ku ta keda ku e avion aki, òf ku e ta wòrdu remplasá dor di otro avion”.

Kresementu

Segun Winkel, for di dia ku e Saab 340 a wòrdu hinká den servisio por a nota ku e kantidat di pasahero a krese konsiderablemente. Hopi hende ta gusta e spit i komodidat di e avionnan Saab. Ademas, for di dia ku e Saab a yega a kuminsá bula pa e suidat di Medellín tambe, ku ta un destinashon mas leu.