KRALENDIJK-  Kompania di aviashon, EZ Air ta pone un siguiente stap den su kresementu i ekspanshon gradual ku e agregashon na su fleta di dos Saab 2000, ku kada un tin un kapasidat di 50 stul. 

E siman aki, e kombenio pa e dos avionnan adishonal a wòrdu firmá. Na 2021 tambe EZ Air a inkorporá kaba dos avion tipo Saab340B, ku kada un 34 stul. Esaki tabata nifiká ku e kapasidat di EZ Air a bira dòbel. Banda di e Saab 2000 nan, pronto lo yega un di tres Saab 340B pa reinforsá e fleta. 

E Saab 2000 nan no solamente ta mas grandi, pero nan por bula basta mas rápido. Ku esaki, ta bira mas fasil pa bula destinashonan un poko mas leu. Asina EZ Air ke bai konektá tambe e islanan di Aruba, Boneiru i Kòrsou ku St. Maarten. Banda di esaki, lo usa e Saab 2000 riba ruta di Medellín.  

“Despues di basta estudio di e avion aki, nos ta hopi entusiasmá. E avion aki ta ofresá mas espasio na pasehero, pero e kos mas importante ta ku e prestashon di e avion aki ta komparabel na esun di un djèt, ora ta trata di spit”, asina direktor general di EZ Air, René Winkel, a splika. Esaki ta hasi posibel pa bula mas leu, pero tambe mas rápdo. Banda di esaki, e Saab 2000 por bula na un altura di entre 29.000 ku 41.000 pia loke ta nifiká ku ta usa ménos fyul. 

Kómodo

Direktor suplente di EZ Air, Sueyenne Dammerman ta bisa ku e aerolía ta risibiendo hopi komentario positivo riba e Saabnan 340B ku ta usando for di algun luna pasá. “E pasaheronan ta gusta ku e avion ta mustra espasioso. Banda di esei, dor di nan grandura, nan tin un stiward òf stiwardès na bordo. “Riba e rutanan mas largu ta parti kuminda i kos di bebe”, asina Dammerman a bisa. Tur esakinan ta kondusí na un bon eksperensia serka e pasahero. 

Dammerman ku Winkel no ke bisa muchu ainda tokante otro rutanan ku posiblemente e kompania di aviashon lo bai bula. “Nos ta studiando diferente destinashon, pero nos tin ku sigui hasi análisis pa kaba di tuma desishon”, asina Dammerman a splika. 

Pa motibu di e echo ku semper tin hopi trabounan di preparashon ku mester tumá lugá promé ku ta kuminsá usa un tipo di avionnobo, por spera ku lo tuma algun luna di tempu pa e avionnan Saab wòrdu inkorporá den e operashon.