Kralendijk- Segun Entidat Públiko Boneiru, e aumento diripiente de kasonan di Covid ta ‘normal’ i no direktamente un fuente di preokupashon. Esaki gobièrno a bisa den un komunikashon pa prensa djaweps atardi.

“A hasi e pregunta si departamento di Salubridat Públiko di EPB tin un splikashon pa e oumento den kantidat di kontagio di e último dianan. Ta di komprendé. E departamento di Salubridat Públiko ta duna di konosé ku fluktuashon manera esaki ta parti di un poblashon chikitu manera Boneiru. 1 persona ku ta kontagiá habitantenan di mesun kas ta kondusí rápidamente na 3 òf 4 kontagio sin ku esei ta di preokupashon”, asina departamentu di komunikashon ta laga sa.

Suavisashon

Ta nota tambe ku e oumento ta pas ku e suavisashon di medidanan. “Pa haña bon bista di tur kontagio, e departamento di Salubridat Públiko ta hasi investigashon di fuente i kontakto. E siman aki mas fuente ta konosí ku siman pasá. Mas hende ku keho bai tèst, mas mihó. Esei ta yuda Salubridat Públiko pa mantené i haña bista riba e kontagionan. Pa e motibu ei, tene bo na e reglanan básiko. E vírùs no a disparsé. Bai bakuná. Mas hende ta bon bakuná, mas lihé nos por bai atrobe na normal, asina Entidat Públiko ta bisa.