WILLEMSTAD – Presidene di frakshon Quincy Girigorie a manda un karta pa komishon fiho di Asuntunan Interior di Tweede Kamer tokante di e pasado di sklabitut. A bai un kopia tambe pa e minister i sekretario di estado di e ministerio di Asuntunan Interior i relashonnan di Reino.

Den e karta PAR ta pidi gobièrnu Hulandes i parlamentu pa huntu enfrentá e pasado di sklabitut i su konsekuensianan i konstruí un futuro nobo pa tur persona den Reino.

Kadena
Frakshon di PAR ta uni su mes ku e rapòrt ‘Ketenen van het Verleden’, ku a traha riba petishon di e minister di Asuntunan Interior i Relashonnan di Reino di e tempu ei Kasja Ollongren.

Konklushon di e rapòrt ta bisa en korto ku Estado Hulandes di bèrdat mester rekonosé e ròl den e tráfiko di katibu ku nan tabatin i den e konsekuensianan ku te ku awe e komunidat Hulandes i mui en partikular e partinan di Reino den Karibe ta enfrentando, mester pidi despensa pa esaki i traha na rekuperashon.

Rekonosimentu, despensa i rekuperashon
PAR ta uni su mes ku e rekomendashonnan den e Rapòrt. Estado Hulandes mester rekonosé e responsabilidat pa su ròl den Tráfiko di katibu, mester pidi despensa i mester traha na rekuperashon di su konsekuensianan den Reino.

Quincy Girigorie ta eksperensiá e relashon aktual ku Hulanda komo no igual. Komo ehèmpel e ta duna e sosten di likides na Kòrsou. “Den mi kalidat komo minister suplente di Asuntunan General mi ta deklará, ku di parti di Hulanda tabatin menshon di ‘abusu di poder’ i ku ‘ta sumamente nesesario ku nos ta hiba un kòmbersashon profundo kon nos ta sigui anda ku otro den Reino den futuro’.

Segun Girigori e tempu ei no a duna Kòrsou e espasio pa kontribuí konstruktivamente na medidanan ku ta mas na midí, ku lo mester tin ménos impakto negativo riba nos komunidat den su totalidat, ‘e berdadero esensia di igualdat’.