WILLEMSTAD – Kenley Jansen i su kasá Gianni a hasi donashon di un “Kenley’s locker” na e departamentu di mucha na Curaçao Medical Center.

“Kenley’s Locker” ta un programa di partisipashon pa e komunidat di Kenley Jansen Foundation. E kahanan di seguridat aki ku e tema Jansen ta kontené Ipad i suich di Nintendo ku weganan i ta sirbi komo fuente di dibertishon i distraishon pa muchanan ku ta interná den CMC.

Kenley i Gianni Jansen mes tin yu. Ora ku nan yu hòmber mayó tabata interná pa un tempu kòrtiku den hòspital na Merka, e pareha a ripará ku tabatin skarsedat di kos di hunga i dibertishon pa e muchanan den e hòspital. Gianni a mira e importansha di kos di hunga i dibertishon pa muchanan ku ta pasa den tempunan difísil. E ora ei a lanta e idea pa un “Kenley’s Locker”.

CMC ta bisa di ta bendishoná ku e regalo aki, pasobra e ta algu ku muchanan por anda kuné ora ku nan ta malu i mientras nan ta rekuperando, pa kita nan mente for di tur lokual nan ta pasando aden.