KRALENDIJK – Resientemente Fundashon Tienda pa Konsumidó Boneriano (FTpKB) a sera un akuerdo di kooperashon ku Union di Konsumidó Boneiru (Unkobon) i Fundashon pa Konsumidó (FpK) na Kòrsou pa kombiná aktividat, forsa i finansa i traha mas dirigí den union. 

Despues di a pasa den un proseso di reorganisashon FTpKB pronto lo ta aktivo atrobe, na bienestar di konsumidónan di Boneiru.

Fundashon Tienda pa Konsumidó Boneriano algun tempu kaba ta pasando den un proseso di reorganisashon, ku a start ku nombramentu di un direktiva nobo na luna di mart 2022. A presentá e plan di reorganisashon na Entidat Públiko Boneiru (EPB) ku e petishon pa mas finansa debí ku poblashon di Boneiru a krese. 

Kooperashon regional

Fundashon ta kere firme den traha huntu ku otro organisashonnan lokal, regional i den reino pa logra e meta integral di sirbi pueblo mas optimal posibel. Pa e motibu ei a sera e akuerdo pa kombiná forsa ku Unkobon i Fundashon pa Konsumidó di Kòrsou.

Banda di esei FTpKB a tuma kontakto tambe ku Komunidat di Skol Boneiru (SGB) pa aktivá hóbennan i konsientisá e generashon nobo i duna nan un chèns pa siña konosé e sistema di komparashon di preis, bou di guia di FpK di Kòrsou. Pronto lo publiká un number di Whatsapp kaminda por mèldu keho i lo bai duna sosten na konsumidónan riba e tereno akí.