Skirbí pa Caribisch Netwerk | Nathaly Evertsz

Bini for di Hulanda òf Kòrsou gana plaka un ratu na Boneiru?  Diferente empresario Boneriano ta preukupá pa empresarionan di den eksterior i turistanan ku ta bini e isla un ratu pa bende produkto i servisio.

Hendenan ta bini ku fakansi òf biahe di negoshi pa bende produktonan manera makiyahe òf kabe’í wowo falsu òf pa ofresé masashi. E konkurensia ta oumentando riba e isla chikitu, e empresarionan ta bisa. Nan no ta inskribí òf registrá riba e isla i tòg nan por hasi negoshi ilimitá.

Riba plataformanan sosial tambe por mira últimamente  diskushonnan. “Nada ta dimas: for di flèktu kabei te na midimentu di kortina. I tur esakinan ta servisionan ku nos komo lokal mes ta ofresé”, un pelukera ta bisa. E ta preukupá ku e ta pèrdè entrada.

Via media sosial for di den eksterior nan ta drenta den kontakto kaba ku nan klientela riba e isla. Ta trata prinsipalmente di hendenan for di Hulanda Oropeo i Kòrsou ku ta bin gana plaka un ratu na Boneiru.

Página di Facebook komo medio di propaganda

E empresa- òf personanan aki ta hasi uzo di páginanan di Facebook ku tin un base di dato di amigu ámplio. Despues e algoritmo di Facebook ta mustr’é na e habitantenan di Boneiru. El a kuminsá promé prinsipalmente ku empresanan di Hulanda ku a bin hasi negoshi na Boneiru. I awor ta mira ku tin hopi interes for di Kòrsou i region. Semanalmente tin por lo ménos tres empresa òf persona ku ta ofresé produkto. Den periodo di fakansi lo tabatin un kresementu.

Polítiko Gianni van den Heuvel (Demokrat) tambe ta pidiendo atenshon pa e problema aki e último simannan. E ta haña ku e  bendedónan ku ta bin hasi negoshi djis un ratu na Boneiru ta hasi ‘daño’ na ekonomia di Boneiru.

Via su kuenta di Facebook Van den Heuvel ta sigui algun luna kaba diferente solisitut. Loke ta remarkabel ta, ta ku e turistanan empresarial awor ta mas alerta ku kompartí nan informashonnan di kontakto. Nan ta operá via adrèsnan di meil general of kuentanan. “Servisio di impuesto mester tuma un ròl pro-aktivo den e kaso aki. Nan por lokalisá e persona- òf empresanan aki.”

Impuestonan lokal

E pregunta ta ku si e ‘turistanan empresarial’ ta faltando ku lei. “Nos ta wak echo- i sirkumstansianan si ta konsiderá un persona komo empresario. No ta importá si e persona aki ta inskribí na Boneiru”, un bosero ta splika.

Hopi biaha nan no mester kobra òf paga Impuesto General di Konsumo (ABB).  “Un salon di beyesa i masashi establesé na Kòrsou tin un establesimentu prinsipal na Kòrsou i no tin sukursal na Boneiru. Si e empresario aki ta presta servisio na Boneiru pa un persona partikular, e ora ei no mester paga ABB pa esaki.”

”Kampaña di informashon”

Van der Heuvel ta haña ku polítika mester tuma akshon. Lo mester deskurashá habitantenan pa kumpra produkto- i servio di turistanan empresarial pa medio di un kampaña di informashon, e ta bisa. “Podisé bo ta paga ménos sèn na e empresa di den eksterior pero e ta hasi daño na ekonomia. Ta importante pa stimulá kompra serka empresanan lokal. Komo komunidat nos mester wak e asuntu aki krítiko”.