KRALENDIJK – For di dia ku a mira un krokodel den awanan di Sorobon riba 8 di òktober, Boneiru ta den estado di alerta. Mientras ku ta sigui ku buskeda di e animal, gezaghebber John Soliano ta konsultá ku diferente partido enbolbí tokante siguridat i posibel reapertura di e popular área di windsurf. Mientrastantu komersiantenan ta sufri pèrdidanan kuantioso i ta spera ku ansiedat riba un solushon. Apesar di e deseo aki, gezaghebber ta laga Bonaire.nu sa: “Koutela ta primordial na momento di reapertura di Sorobon despues ku a mira e krokodel”.

Riba e anochi di 8 di òktober a informá gezaghebber John Soliano ku a mira un krokodel den área di Sorobon, un área di windsurf gustá riba e isla. E notifikashon a drenta via Stinapa, e organisashon di naturalesa na Boneiru, ku mesora a drenta akshon despues ku a informá nan. Soliano ta konfirmá ku for di e momento ei a start un búskeda intensivo di e animal, pero ku for di e anochi ei no a mir’é mas.

“Tabatin hopi esfuerso di Stinapa i mi tim,” Soliano ta bisa. “Nos a hasi uso di as, kámara i drone pa vigilá e situashon. Nos ta kere ku ta trata di un krokodel Merikano, ku normalmente lo no ataká hende lihé.” Sinembargo e preukupashon bou di pueblo i e komersiantenan ta grandi, espesialmente pasobra e laman ta será pa públiko.

Búskeda i siguridat 

E búskeda di e krokodel ta sigui, pero no sin desafio. “Ta buskando dirigí a base di e komportashon di e tipo di krokodel aki,” Soliano ta splika. “Nos ta buska inteligente, no parotin. Nos sa ku e animal aki por sobrebibí  un luna sin kome atrobe, pues nos mester tene kuenta ku e periodonan mas largu ku e ta tene su mes skondí.”

Segun Stinapa mes ta splika nan a usa e medionan apropiá, pero ta parse ku riba e anochi ku a mir’é mes no a tuma akshon pa kapturá e animal. “Na e momento ei no tabatin redanan adekuá pa kapturá e krokodel,” Soliano ta rekonosé. “Banda di esei e animal a disparsé lihé. Nos mester pèrkurá awor ku nos ta kaptur’é seif ora e bolbe sali.”

Reapertura di Sorobon stap pa stap 

Pa e komersiantenan den e área e situashon ta agudo. Diariamente nan ta mira nan entradanan bira ménos pa motibu di e siere. Ta diskutí diferente senario ku e negoshantenan i outoridat lokal pa un apertura parsial di Sorobon. “Nos ta bai aktua den fase,” Soliano ta bisa. “Ku e koutela nesesario nos lo habri bèk probablemente riba término korto, pero e awa ta keda por lo pronto tereno prohibí.”

E gezaghebber ta enfatisá ku siguridat ta primordial, pero ku mester buska solushonnan pa término largu tambe. “Nos mester inventarisá e riesgonan bon, tantu pa e personanan ku ta praktiká windsurf komo pa otro bishitantenan.”

No tin ayudo finansiero pa komersiantenan 

Apesar di e situashon difísil pa komersiantenan, por lo pronto no ta papia di kompensashon finansiero dirèkt di parti di gobièrnu. Soliano ta splika ku no tin un fondo spesial disponibel pa semehante akontesimientonan. “Esaki ta kai bou di riesgo di nogoshi, kontra kua komersiantenan normalmente por sigurá nan mes,” segun e gezaghebber. Nos ta purba di mitigá e daño mas tantu posibel dor di aktua rápido i buska koperashon ku e komersiantenan.”

Biba ku e krokodel?

Mientrastantu ta parse un scenario real ku den futuro Boneiru lo hañ’é mas hopi biaha konfrontá ku krokodelnan. “Na e momento aki nos mester siña biba ku e idea di presensia di un krokodel den nos palunan di mangel,” Soliano ta bisa. “Esei ta nifiká ku nos mester tuma e medidanan apropiá i mester siña komprondé e komportashon di e animal mihó.’” Ounke sierto investigadó ta sugerí ku presensia di un krokodel ta un señal positivo pa e sistema eco, e gezaghebber ta keda kouteloso. “Mi tambe a lesa e opinionnan aki. E pueblo Boneriano i e turistanan tampoko no a siña biba ku un krokodel den nos presensia. P’esi mi ta kouteloso tambe ku e interpretashonnan aki.”

E próksimo dianan lo tin mas klaridat di e státus di e krokodel i e posibel reapertura di Sorobon. Djaluna ta spera un deklarashon ofisial di outoridatnan, kaminda ta anunsiá pasonan konkreto.