WILLEMSTAD – Djaluna último e fotógrafo Bea Moedt a ofresé su buki “Curaçao, my lasting love affair” na gobernador di Kòrsou, Lucille George-Wout

E buki ta kontené e pòtrètnan mas bunita di Moedt kende ta biba for di 1993 komo fotógrafo na Kòrsou.

E ganashi di e buki ta bai kompletamente pa e hospice Arco Cavent kaminda e ta pasando e delaster parti di su bida rondoná ku e kuido ku e mester. Moedt tin kanser i no tin trato mas p’e.

Riba su sitio wèb e ta skirbi ku e ta gradisido pa un bida yen di eksperensia bunita ku el a biba kompletamente i a imortalisá esaki te den detaye ku su kamera.

E ta mira bèk ku bunita rekuerdo riba asina tantu oportunidat ku a hasi posibel pa e por a imortalisá e bunitesa puru, sinsero i kolorido ku Kòrsou tin di ofresé.