ORANJESTAD – E defensora pa un medioambiente limpi na Aruba, Anouk Balentina tin krítika riba e aktitut ménos koperativo di gobièrnu di Aruba pa komo siudadano bo por haña akseso den otorgamentu di pèrmit.

Motibu ta e opstákulonan ku gobièrnu ta plantia pa loke ta trata e dunamentu di pèrmit pa un Lei di estorbo ambiental na e prosesadó di sushi Serlimar.

“Un dia despues di e komienso di e periodo di trinta dia ku e siudadano por haña akseso, e dokumentonan no tabata presente ainda”, segun Balentina. Nan a pidi’é pa bini bèk despues di wikènt.

Segun e aktivista ta desperdisiá asina dianan balioso ku e siudadano por ehersé su derecho i pa kolmo esei ta en kontra  di e Lei di estorbo ambiental.

Seguidamente a informá Balentina ku e no por haña kopia òf saka pòtrèt di e petishon, apesar ku e ta un persona direktamente interesá komo habitante di bario di Parkietenbos.

E hurista ta bisa ku no tabatin dokumentonan original presente durante e akseso, mientras e Lei di estorbo ambiental si ta eksigí esei. “Awor tin diferente palabra manera establesé, kambia di lugá pa depositá sushi, koba i tapa. Ku esaki e petishon a bira un pùzel vago. Komo persona interesá no ta kla p’ami kiko presis a pidi i kiko presis e molèster lo ta ku ta warda ami i mi yunan asmátiko, komo personanan ku ta direktamente interesá”.