Kralendijk – Ku un seremonia kòrtiku gobièrnu di Boneiru i Tourism Corporation Bonaire a yama bon biní na e barku krusero Equinox di Celebrity Cruises ku ta e promé barku ku a mara na Boneiru despues di 18 luna di ousensia di barkunan krusero relashoná ku Covid-19. E Cruise & Project Coordinator nobo di TCB Elesiër Angel a introdusí diputado di desaroyo ekonómiko i turismo Hennyson Thielman, kende den su diskurso a bisa ku gobièrnu di Boneiru ta kontentu di por risibí un barku krusero bèk despues di 18 luna. Segun Thielman, aunke ku Covid-19 no a pasa ainda, tòg serka gobièrnu di Boneiru ta reina e speransa ku e situashon ta sigui drecha i ku nan tin hopi konfiansa pa futuro. Tambe diputado Hennyson Thielman a gradisí tur hende ku a forma parti di e preparashonnan i a ekspresá e deseo ku pasaheronan i tripulashon di Equinox lo pasa un dushi dia na Boneiru i ku e ta spera di mira nan pronto bèk na nos isla.

Kontinuando ku e seremonia diputado Thielman a entregá bandera di Boneiru na kapitan di Equinox i Miles Mercera, CEO di TCB, a hasi entrega di un álbùm ku bunita paisahe di Boneiru. Kapitan di haf Gunther Flanegin a opsekiá un potrèt grandi di e barku Equinox na momentu ku tabata spùit awa riba esaki. Nos Miss Turismo Sunniva Manuel a pega un pen di rekuerdo na kamisa di e kapitan.

---

Lesa tambe:

• 
  OLB ta kuminsá eksplorá snèk saludabel pa mucha na Kolegio San Luis Bertran
• 
  No tin sufisiente klaridat ainda di ‘promé stapnan’ na lèntfel Boneiru despues di intervenshon di Hulanda
• 
  Tourism Corporation Boneiru satisfecho ku partisipashon na DEMA Diveshow
• 
  Subway Boneiru a habri bèk despues di renobashon
• 
  Prosedura pa mèldu negoshi di hóreka i negoshi di konstrukshon a kuminsá ofisialmente