ORANJESTAD – Ministerio di Transporte Kanades a duna pèrmit na WestJet Airlines pa adoptá Sunwing Vacations i Sunwing Airlines di Toronto.

Tantu WestJet komo Sunwing ta bulando aktualmente  pa Aruba i asta a oumentá e frekuensia di nan buelonan pa Oranjestad. A añadi tambe rutanan nobo for di Toronto pa Aruba. WestJet ta bula pa Kòrsou tambe.

“Despues di a konsiderá e bentaha- i desbentahanan, nos a tuma e desishon di manera ku Sunwing por sigui ofresé paketenan di fakansi pagabel na Kanadesnan, krea mas empleo i protehá e empleonan eksistente, loke ta konta tambe pa e Kanadesnan ku a kumpra nan pasashinan kaba”, segun e ministerio na Toronto.

Mirando e fushon, Westjet, e di dos kompania di aviashon mas grandi di Kanada, lo tuma e ret di buelonan regular i charter di Sunwing, ku ta operá prinsipalmente den Kanada òf entre Kanada i destinashonnan kalor den área di Karibe i Mexico.

E fushon lo kombiná tambe WestJet Vacations ku e operadó di tour di Sunwing. E operashon kombiná lo ta establesé na Toronto i e markanan Sunwing i WestJet Vacations ta keda riba merkado. E ofisina prinsipal di WestJet Group ta keda na Calgary. E kompania ta manehá tambe e kompania di aviashon ku kostonan super ekonómiko Swoop i dos kompania di aviashon regional.

Komo parti di e aprobashon WestJet a komprometé su mes entre otro na oumentá e konektividat regional, mehorá e maneho di ekipahe i mantené e kapasidat riba rutanan ku e fushon aki tin mas influensiá riba dje.