WILLEMSTAD – Anthony Godett ta hasi esfuerso pa liberá Cicely van der Dijs. E ta hasi un yamada na rei Willem Alexander pa e duna grasia na èks-esposa di èks promé minister Gerrit Schotte.

Van der Dijs ta sinta un kastigu di prizòn pa labamentu di plaka relashoná ku korupshon atministrativo di Schotte durante su tempu komo promé minister di Kòrsou.

Finalmente a sentensiá Schotte na tres aña di prizòn, ku ya el a kumpli kuné. Van der Dijs a haña djessinku luna, di kua seis kondishonal. A detené na luna di ougùstùs aña pasa.

Van der Dijs ta mama di dos yu chikí i propietario di e pòmpnan di gasolin Vanddis, un kadena ku tin 220 trahadó. Godett ta yama e minister di Hustisia Shalten Hato di MFK, e partido di Schotte, pa trata e petishon di grasia.

Segun e èks-lider di FOL, grasia lo ta un bunita gesto pa Van der Dijs, pero mester ta aplikabel tambe pa tur hende ku ta sintando kastigu na Kòrsou pa delitunan relativamente chikitu. E ta inspirá pa presidente di El Salvador, Nayib Bukele, ku a laga 3000 persona sali liber prematuro.

Godett tabata aktivo den polítika di Kòrsou pa mas ku dies aña. Na 2004 e tabata lider di FOL, e partido mas grandi na e momentu ei di Kòrsou. E kier a bira promé minister, pero tabata embolbí den un kaso di froude i mester a bai prizòn su mes. Su ruman muhé Mirna Louisa-Godett a bira e ora ei promé minister pa nuebe luna.