KRALENDIJK- Un grupo di artista, bou di guia di e pintora lokal Ghislaine Monte, ta enkargá pa duna ofisina di turismo un imagen completamente nobo, i hopi mas atraktivo.

E kambio pa e ofisina ta kuadra den a vishon di direktor interino, Miles Mercera, pa un kambio den e imagen di Boneiru pa medio de merkadeo i avisonan, ku ya a implementá.

E ofisina di turismo mes, sin embargo, semper tabata tin un aparensia poko ‘laf’ i no masha virbrante. Ku e kambio radikal ku ta tumando lugá, ningun hende lo pasa ofisina di turismo forbei si nota esaki for di aleu. 

Krítika

Riba medianan sosial ya por a mira e promé krítikanan bin dilanti, kaminda ta sugerí ku lo ta artistanan estranhero lo ta enkargá ku e pintamentu di e edifisio. Monte, komo lider di proyekto tin ku hari ora e skucha esaki. “Arte no konosé rasa”, asina Monte a bisa. “Nos tur ta bin huntu pa traha pa e mesun meta”, asina e artista ku t konosí pa su amor pa kolónan vibrante a bisa.