KRALENDIJK- A lanta un grupo di preshon pa bringa kontra di inhustisia pa loke ta trata kobransa di Impuesto di salida (Airport Tax) ku Bonerianonan ta paga, ora di usa primeramente Kòrsou komo aeropuerto di tránsito. 

E grupo di preshon, ku a haña e nòmber Airport Tax Busters Bonaire (ATBB) ta un inisiativa di Harald Linkels, Lisandro Cicilia i Angelo Engelhart. “For di dia ku Antia Hulandes a plama for di otro ta manera un ‘free for all’ pa loke ta trata kobransa di impuesto di salida pa Bonerianonan ku ta sali for di e isla”, asina Harald Linkels ta splika motibu pa a lanta e grupo di preshon. 

“Kaminda ku antes na Kòrsou tabata kobra biahero for di Boneiru un asina yamá ‘transfer tax’ di 5 dòler, despues a subi esaki pa 9 dòler i awor aki e ta 15 dòler. Tur esaki ainda por komprondé, pero en realidat e biahero ku ta sali for di Boneiru ta paga 15 dòler di impuesto di salida den su pasashi pa bula bai Kòrsou, pero kada pasashi di Avianca, Copa, SLM i otronan tambe tin 63 dòler hinká den e pasashi”, asina Linkels a splika. 

Tur pasahero ku ta sali for di Boneiru pa konektá riba otro aerolínea na Kòrsou ta paga no ménos ku 98 dòler na impuestonan di aeropuerto só den un pasashi ida i buèlta. Kaminda ku bon mirá, segun ATBB ta bisa, na Kòrsou lo mester paga 15 dòler só i no 63.

Konektividat

Segun Lisandro Cicilia ta bisa, ta papia hopi tokante konektividat entre e islanan, pero impuestonan eksagerá ta un faktor ku no ta yuda ètòl. “Den sierto kaso, e impuestonan ta yega te na un terser parti di e gastunan total di un pasashi. Esaki sin tene kuenta ku un hende ku ta sali for di Boneiru pa sigui biaha pa por ehèmpel Colombia ya kaba tin ku paga un pasashi adishonal pa por kue un buelo ku ta sali for di Kòrsou òf Aruba”. 

Famia

Angelo Engelhart ta mustra riba e konsekuensianan finansiero pa hopi famia. “Si un famia di 4 persona ke bai fakansi den region i nan mester pasa Kòrsou pa subi otro avion, na airport tax so tin ku paga kasi 400 dòler. Sin tene kuenta ku e gastunan di pasashi mes”. Segun Engelhart di e forma aki, biahamentu òf un fakansi no ta alkansabel pa hopi famia na e isla i esaki ta keda reservá pa esnan ku entrada hopi riba e promedio di loke ta kobra na salario mensual. 

Visitor Entry Tax

E impuesto pa residente no ta e úniko punto di atenshon di di e grupo di preshon. “Tin sierto inhustisia tambe ta tumando lugá ku e impuesto di entrada ku gobièrnu di Boneiru a implementá aña pasá. Pa di promé no ta hustu ku Boneriano bibando den eksterior tin ku paga 75 dòler pa drenta nan isla natal. E kos aki ta inhumano i inhustu. Pero tambe e echo ku un turista ku ta drenta, bai hasi un bishita kòrtiku na Kòrsou òf Aruba pa bin bèk, kada bes di mas mester paga e 75 dòler atrobe”.

Segun ATBB ta bisa, ounke ku kolegio ehekutivo anterior a atmití ku e Visitor Entry Tax tin sierto parti indeseabel den dje, gobièrnu i ámbos koalisahon aktual i esun anterior no a mustra nan mes di ta kapas pa drecha e partinan aki i ta haragan pa sèn.