KRALENDIJK- Diputado Hennyson Thielman ta e persona ku lo enkabesá e lista di parti Movementu pa Pueblo Bonariano. Renata Domacassé a resultá number dos, mientras ku Elvis Tjin Asjoe ta number tres riba e lista. 

 “Pami ta un honor pa karga e posishon ku mi a haña. Mi ku Elvis  Tjin Asjoe a papia algu i di bèrdat e ta demostrá loke e ta bisa. Nos tin un lista fuerte. E hendenan ta bisa mi nan ke hasi orashon i ta bai pe, no ta importá si nan no haña hopi voto. E partido aki ta esun ku mester pa guia Boneiru den e direkshon korekto. Nos a goberná serio i ta mira e resultado. Boneiru ta den desaroyo i e hende lokal mester di dje. Mi ta sigur e lista ku nos tin ta esun ganadó!”

Elvis Tjin Asjoe tambe a hiba palabra.  “Un lista balansá ta loke MPB a pone kla. Tabata fásil pa yena lista, solamente e ponementu di posishon a bai poko trankil. 17 hende muhé riba lista i tambe hende ku a bin di afó pa bai riba lista. Nos a bin pa krea lider nobo, p’esei nos tei, kargá pa lidernan hóben i nobo. Poulatinamente nos ta bai informá pueblo di e lista di MPB, ” Tjin Asjoe a bisa despues di a entrega lista di partido pa elekshon di mart binidero.