Kralendijk – Segun diputado di Finansa, Hennyson Thielman, e Kolegio pa Supervision Finansiero (Cft) no ta konsistente. Segun Thielman Kolegio Ehekutivo tabata tin palabrashon kla ku e Kolegio pa loke ta traha prespuesto pa aña 2022. Pa sorpresa di e diputado, despues tòg ta manda karta pa kritiká varios kos.

“Hopi aña largu presupuesto di Entidat Públiko Boneiru a konsistí di solamente informashon tokante tareanan regular i akshonnan di añanan anterior ku un splikashon tékniko di e sifranan. E presupuestonan anterior akí no tabata laga mira na un forma kla, kiko e plannan di maneho di gobièrnu tabata. E sifranan presentá no tabata konektá na e  maneho intenshoná di Entidat Públiko Boneiru”, asina Thielman ta bisa den un deklarashon pa prensa djadumingu.

Segun e diputado ta bisa, pa e motibu aki tabata difísil pa direktoradonan di Entidat Públiko Boneiru pone prioridatnan klaro basá riba e fondonan disponibel pa ehekushon, durante e aña presupuestario. Falta di un bista kla riba e propio presupuesto a kontribuí tambe na un situashon kaminda tur aña tabata gasta ménos sèn ku tabata disponibel, loke CFT a trese dilanti den diferente konseho. Kolegio Ehekutivo a duna oído na e konsehonan akí i p’esei den presupuesto 2022 a mustra na un forma bon kla e konekshon entre e intenshonnan di maneho i e medionan finansiero disponibel.

“Den vários karta CFT a ekspresá su preokupashon tokante e situashon kaminda ta gasta ménos sèn ku ta disponibel, i tambe a pone énfasis riba e punto akí durante kòmbersashonnan. P’esei ta desapuntante ku den CFT su karta di konseho komo reakshon riba e presupuesto, no ta mira bèk e mehorashon ku a keda realisá”, asina Thielman ta bisa.

Reserva general

Un otro punt ta, segun Thielman, ku durante un kòmbersashon ku CFT dia 29 di yüni último, CFT a rekomendá Kolegio Ehekutivo pa hasi uso di e reserva general, i a bolbe konfirmá esaki den un karta di CFT di 13 di ougùstùs último. Netamente a base di e palabrashon akí a disidí pa pone medionan èkstra disponibel den presupuesto 2022 pa por invertí den Boneiru. E medionan akí ta bini disponibel pa medio di hasi uso di un parti chikitu di e reserva general pa ekilibrá e presupuesto. Despues di un análisis eksperto riba e posishon finansiero di Entidat Públiko Boneiru, a resultá ku ta akseptabel pa hasi uso di USD 2 mion for di e reserva general””, segun e diputado di Finansa.

Segun Thielman a komuniká ku CFT tambe ku Kolegio Ehekutivo ta bai kontratá un eksperto pa hasi un análisis di riesgo amplio, ku lo forma e base pa un kalkulashon renobá di e kapasidat di resiliensia (“weerstandsvermogen”). E resultado di e análisis aki lo keda raportá den un nota di maneho di riesgo i di kapasidat di resiliensia. Komo parti di e mesun enkargo akí, e empleado eksperto lo formulá tambe un nota di reserva i provishon. Teniendo kuenta ku disponibilidat di likides di Entidat Públiko Boneiru, esaki lo inkluí tambe plannan konkreto pa gastunan di gobièrnu.

Pa e motibu akí Kolegio Ehekutivo ta asombrá ku den e karta di 1 di sèptèmber último CFT ta indiká esaki komo punto di atenshon, miéntras ku ya kaba a informá CFT tokante esaki i entretantu e eksperto a kuminsá kaba ku e análisis.