Kralendijk – Hóben entre 12 te ku 17 entrante awe, 2 di yüli 2021, tambe por mèldu pa pasa angua kontra Corona. Por hasi esaki via e number grátis 0800 0900 di djaluna te ku djabièrnè di 08:00 – 17:00 or.

Ta kuminsá bakuná e hóbennan entrante 6 di yüli 2021. Konseho di Salú esta Gezondheidsraad na Hulanda a konsehá pa bakuná  hóben den e grupo di edat akí. Na Boneiru e  hóbennan di 12 te ku 17 aña di edat mester pèrmit di nan mayor òf tutor pa nan por pasa angua.

Ta bakuná kontra e vírùs di corona riba 6 di yüli. Ta bisa e ora eksakto na momento ku mèldu. Despues ta anunsiá e otronan dianan ku ta bakuná. Mayornan tin ku firma un deklarashon na e sitio ku ta bakuná, dunando asin’ei pèrmit pa nan yu haña e bakuna. E mayornan mester por identifiká nan mes ku un sédula òf ID.

Kontagio

Segun Gobièrnu ta skibi, delaster tempu tin mas i mas kaso di hóben i e hendenan ku ta biba ku nan den kas,  ta pega ku e vírùs di corona. E hóbennan no ta bira gravemente malu, pero nan mester bai den isolashon sí. Den práktika ta resultá ku e hóbennan tin problema pa bai den isolashon. Si e hóbennan bakuná, esei ta yuda pa evitá ku e vírùs di corona ta plama na e isla. E chèns ta chikitu ku hóbennan ku a pega ku e vírùs ta bira gravemente malu. Ku e angua kontra corona e chèns akí ta bira mas chikitu ainda pa nan.

Na Boneiru tin mas o ménos 1.400 hóben den e edat di 12 te ku 17 aña. Departamento di Salubridat Públiko tin bastante bakuna pa bakuná e hóbennan.