KRALENDIJK – Muchanan Boneriano di mas chikí a haña un eksperensia bunita fin di siman ku a pasa ora ku nan por a partisipá na e Pinto 8U International Baseball Classic.  Den e siudat Merikano Marion e muchanan U8 a mustra den diferente partido kuantu talento di beisbòl tin na Boneiru. No solamente e grupo tabatin hopi pleizir, pero na final di e fin di siman nan a sa di kue e título tambe.

Pinto 8U International Baseball Classic ta ta un torneo di beisbòl internashonal pa hungadónan di 8 aña i mas abou. E ta parti di e programa di Pony Beisbòl i Sòftbòl, ku ta organisá kompetensianan pa hubentut rònt mundu. E torneo aki ta brinda hungadónan hóben e oportunidat pa mustra nan abilidatnan, haña eksperensia den un ambiente kompetitivo i hunga kontra timnan di diferente pais.

Bunita resultadonan

Partisipá na e torneo International Baseball Classic ta mas importante ku gana. Sinembargo e hubentut di Beisbòl Boneriano a demostrá ku tin hopi talento. Den e prome tres partidonan a bati e oponentenan relativamente fásil. Nan a gana fásil kontra Roylaton Il (13-0), Matoon Il (10-1) i Carbondale Il (8-2).

Den e kuart finale tampoko no a laga nada hinté di e siguiente oponente Merikano. A pone Marion Il un banda ku skor di 10-3. Den semi final tabatin un oponente Chines riba programa. Atrobe a habri afó. Ku skor di 15-3 e grupo hóben a posishoná pa final. Nan a gana ku 8-0 di e tim Merikano Centralia Il.

Premionan individual

Riba tereno individual tambe nan a haña algun premio. Esheriev Trinidad tabata un di e koredónan mas lihé. El a kore un tempu di 12,10 sekònde i ku esaki e tabata esun mas lihé di e 32 partisipantenan. Caleb Noor tabata na di dos lugá den e kontèst di bati honron.