KRALENDIJK- ABVO por a gana su kaso den korte, pero den pueblo por nota un indignashon pa ku e aktitut di ABVO, ora ta trata di representashon di e empleadonan na TELBO.

Riba djasabra ABVO a gana un kaso kontra di mediadó di gobièrnu pa loke ta trata e referendum ku a tene dia 4 di yüli último na e kompania di Telecom. Den e referendum 39 hende a vota pa un represenstashon pa AFBW, i un solo persona a vota pa ABVO. Sinembargo, wes a bai di akuerdo ku ABVO ku mediadó no a duna partidonan e tempu kompletu ku lei ta preskribí ora di organisá un referendum.

Reflekshon interno

Por a nota hopi komentario den trankurso di wikent, kaminda ku ta wòrdu ekspresá ku ABVO ta hibando un lucha ku no tin ningun sentido. “Mihó ABVO buska moda pa evaluá dikon tur kaminda ta koriendo ku nan”, por a lesa den vários komenterio. Ningun hende ta dudando ku si mester bolbe organisá un referendum na TELBO, ku AFBW lo bolbe gana esaki di forma aplastante. Resientemente empleadonan di Curoli Boneiru tambe a disidí di kore ku ABVO i a move bai AFBW ‘en blòk’, algu ku aña pasá a pasa na Selibon tambe.