KRALENDIJK- Djasabra por a nota hopi reakshon negativo, despues ku Gobiernu di Boneiru a publiká riba su página di Feisbuk un bòrchi ku a pone na BIA, ku e pregunta si bishitante a paga na Visitor Entry Tax kaba. 

“Ta un mahos bista ora turista yega, anto e promé kos ku nan ta mira ta un bòrchi tokante impuesto”, asina por a lesa entre otro. 

Bishitantenan di 12 aña i mas chikitu i habitantenan di e anterior Antia Hulandes ta paga 10 US dòler pa bishita. Tur otro bishitante di 13 aña bai ariba tin ku paga 75 US dòler. Habitantenan di Boneiru no tin mester di paga e Visitor Entry Tax.

Sedula

Entidat Públiko Boneiru (EPB) ta kòrda biaheronan pa biaha ku nan sedula original. Un kopia di sedula no ta wòrdu akseptá. Esaki ta importante pa bishitantenan di islanan hermana, ku mustrando na sedula lo paga un tarifa spesial di 10 dòler. 

Residentenan di Boneiru no ta paga nada, pero tambe mester mustra e sedula komo prueba ku hende ta residente. 

Tambe EPB ta konsehá hende pa paga di antemano. Hende ku ta paga di antemano (online), ta risibí un kodigo QR ku por mustra na yegada. Esnan ku no a logra paga di antemano, mester hasi esaki yegando for di eksterior. Por hasi pago solamente ku karchi, sea debito òf kredito, pero no por paga ku plaka kèsh.