Hospital ta tuma medida despues di subida rápido di pashènt ku Covid

KRALENDIJK- Pa motibu di e kantidat di hospitalisashon debí na Covid-19 ku a oumentá, Fundashon Mariadal ta haña su mes obligá pa mesora pasa over pa loke e ta yama ‘kuido di kohorte’ i apliká e reglanan di prevenshon den un forma mas estrikto.

E hospital a disidí pa entrante 23 di òktober 2021 organisá un parti di departamento Sentebibu (hòspital) pa kuido di kohorte. Di e manera akí banda di Kuido Intensivo espasio èkstra ta bini disponibel pa duna kuido na pashènt di Corona. 

Menos operashon

Aparte di esaki riba término kòrtiku ta bai hasi ménos operashon elektivo. Esaki ta nifiká ku ta posponé operashon ku no ta di emergensia.

Un departamento di kohorte ta un espasio kaminda ta tene pashèntnan ku tin e mesun vírùs estriktamente separá for di otro pashèntnan i ta duna nan kuido na un manera adekuá den isolashon den grupo. E motibu pa e medida akí ta oumento di e kantidat di pashènt di COVID-19 ku tin mester di kuido intensivo. Pa kuido di kohorte reglanan hopi estrikto ta na vigor.

Bishita

Normalmente pa dia tin 2 momento di bishita ku ta di 11:30 or pa 13:00 or i di 18:30 or pa 20:00 or. Pa kada pashènt ta pèrmití solamente un (1) bishitante pa dia. Esaki ta konta tambe pa bishita na mama ku a haña yu. Bishitante, kliente i pashènt tin ku tene kuenta ku uso di un tapaboka médiko ta obligatorio den hòspital i den botika. No ta pèrmití tapaboka di paña. Ta skrin bishitante na entrada di hòspital.

Hospital ta enfatisá ku si hende sinti keho ku por mustra riba kontagio ku COVID-19, no tin mag di bin hòspital. “Keda kas, aunke bo tin un sita. Den hòspital tene semper un distansia di un meter i mei for di otro hende. Asina bo ta protehá no solamente bo so, pero tambe nos empleadonan den kuido” asina hospital a skibi den un komunikado djasabra atardi.