WILLEMSTAD – Diferente organisashon di derechonan humano a pidi den un karta na Hulanda, Kòrsou, Aruba i Sint Maarten pa un tratamentu mas humano pa e refugiado- i migrantenan di krísis Venezolano. ‘Hulanda mester stòp di bira su kara otro banda.’

E organisashonnan Amnesty International, Vluchtelingenwerk Nederland i Human Rights Defence Curaçao (HRDC) a manda un karta pa e presidentenan di Parlamento di Kòrsou, Aruba i Sint Maarten i di komishon di Reino di Eerste i Tweede Kamer.

Nan ta reuní e siman aki tres dia largu na Kòrsou den kuadro di e Interparlementair Koninkrijksoverleg, IPKO, ku ta tuma lugá kada seis luna.

HRDC ta splika ku tin krítika riba e echo ku Hulanda ta finansiá renobashon di e asina yamá ‘baraknan pa strañero’ na Kòrsou sin pone eksigensia pa e akohida.

E strañeronan ku a sera den prizòn ta ainda tras di waya di sumpiña i den espasionan ku trali i ta kita nan libertat asina.

Riba 7 di febrüari Amnestu a saka un rapòrt di e situashon di e Venezolanonan indokumentá na Kòrsou. Ta e di tres rapòrt for di 2018 tokante e tópiko aki. Den e añanan ku a transkurí segun Amnesty e situashon apénas a mehorá pa e refugiado- i migrantenan di krísis.

Ta p’esei e organisashonnan di derechonan humano no ke pa Hulanda skonde mas tras di argumentonan manera outonomia den asuntu di strañeronan. Nan ke pa bini un akohida humano, kaminda Venezolanonan por warda den libertat riba un estadia legal sea temporal òf nò