DEN HAAG – E situashon na lèntfel Lagun na Boneiru ta bou di supervishon severo, i Hulanda por intervení atministrativamente pa motibu di supuesto negligensia di tarea di gobièrnu lokal. E kuadro di maneho ei e Representante di Reino pa Karibe Hulandes ta usa na e momento aki.

Mediante un trapi di eskalashon Hulanda por hasi uso di un intervenshon hurídiko si e situashon no mehorá rápido. Boneiru ta pará na e momento aki na fase tres di e trapi di eskalashon aki, loke ta nifiká ku Hulanda ta supervisá aktivamente i ta traha palabrashonnan ku Entidat Públiko Boneiru tokante akshonnan konkreto i términonan.

E problema ta sintá na e prosesamentu di sushi riba e isla, ku segun e rapòrt di Inspekshon Medio ambiente i Transporte (ILT) ta funshoná insufisiente. E rapòrt di inspekshon ta konkluí ku e situashon na Lagun ta serio, urgente i kompliká, ku rísikonan pa tantu medio ambiente komo salubridat públiko.

Reakshonando riba e resultadonan aki Kolegio Ehekutivo di Boneiru a tuma pasonan, manera imponé medidanan na kompania di sushi Selibon NV, ku ta responsabel pa e lugá di depositá sushi. Aki ta trata di korekshonnan temporal, manera almanesamentu di supstansianan peligroso i kombatimentu di kandelanan bou di suela persistente.

Gobièrnu di Boneiru ta traha riba solushonnan riba término korto,  mediano i largu, entre kua e partisipashon di un direktor di programa spesial i koperashon ku ekspertonan Hulandes. Asina Boneiru ta haña yudansa di Omgevingsdienst Nederland, Rijkswaterstaat i Afvalzorg Nederland pa stabilisá e situashon na Lagun i realisá solushonnan duradero.

E enfoke polítiko na momento di negligensia di tarea konosé un presedente na Sint Eustatius, kaminda anteriormente Hulanda a intervení den e gobièrnu lokal pa motibu di defisiensia atministrativo. Den e kaso ei e maneho a kondusí na un traspaso a largo plaso di e gobièrnu dor di Hulanda pa realisá stabilidat i reformashon. Na Boneiru e Representante di Reino por, si ta nesesario, sigui e mésun ruta i tuma medidanan hurídiko pa implementá e kambionan nesesario.

E situashon na Lagun ta forma parti di un maneho mas ámplio pa maneho di sushi na Boneiru, pa kua Ministerio di Infrastruktura i Gestion di Awa ta primintí sosten. E programa aki ta aspirá desaroyo di un maneho di sushi mas duradero i mas efisiente, tantu pa medio di invershon komo pa medio di leinan estrikto i kòntròl.