DEN HAAG – Hulanda ta bai depositá sèn pa Kòrsou pa e akohida nobo pa strañero den prizòn SDKK. Esei Alexandra van Huffelen ta skirbi Tweede Kamer.

Segun e sekretario di estado Kòrsou a progresá sufisiente pa duna strañeronan un trato humano i pone e kondishonnan pa strañeronan igual ku normanan internashonal.

Knops

Sekretario di estado Knops a nenga na luna di yanüari di aña pasá pa sigui invertí den mehorashon di akohida pa strañero pasobra Kòrsou no a presentá na e reunion.

Motibu pa e desishon aki tabata e rapòrt di Amnesty International, ‘Nog steeds niet veilig:  Venezolanen krijgen geen bescherming op Curaçao’  di 11 di òktober 2021.

Akseso pa asistensia hurídiko i kuido médiko, edukashon di personal pa loke ta trata trato di strañero, reglanan di kas korekto pa e diferente régimennan i un okupashon di dia útil tabata e eksigensianan ku Knops a pone.

Segun Van Huffelen a kumpli awor ku esei. E ta di opinion ku último lunanan a tuma pasonan konkreto pa mehorá tantu e asistensia hurídiko komo e programa di dia i a duna formashon i entrenamentu na e personal ku ta traha den Akohida pa Strañero pa entre otro mehorá e trato di e strañero.

Ademas segun e sekretario di estado Kòrsou tin plan pa atraé i forma personal pa instalá un espasio médiko i ehekushon di un programa di dia dirigí riba strañero dentro di e akohida, Señora van Huffelen ta skirbi.

Proyekto piloto publikashon aktivo 

Desde 1 di mei 2021 ‘Wet open overheid’, Woo, ta vigente, kaminda ta deskribí ku mester publiká aktivo komo informashon salí for di un órgano di gobièrnu.

Den e kuadro aki tin un piloto dentro di ministerio di Asuntunan Interior i Relashonnan di Reino kaminda ta eksperimentá ku publikashon aktivo di informashon.

Dentro di e piloto aki a skohe pa públiká e proseso pa yega na paga e fondonan ku a resta pa detenshon di strañero na Kòrsou.

Ta publiká e informashon ku ta pertenesé na e proseso, manera karta, faktura i interkambio di meil ku a kontribuí na realisashon di e desishon di señora van Huffelen meimei di febrüari riba e sitio di rijksoverheid.nl