WILLEMSTAD – Despues di un periodo difísil di reseshon ekonómiko tin bon notisia pa Kòrsou. Fondo Monetario Internashonal (IMF) ta konstatá ku ekonomia di e isla ta rekuperando, spesialmente pa motibu di un kresementu fuerte den e sektor turístiko i invershonnan grandi den e sektor partikular.

IMF ta asentuá sinembargo ku si ke benefisiá di e potensial ekonómiko kompleto di Kòrsou, lo mester tin un strategia di desaroyo fuerte i ku esaki mester tin sosten di tur partinan embolbí.

A tuma un paso importante resientemente ku introdukshon di un maneho di debe riba término largu i un strategia di invershon. Esaki lo yuda pa desaroyá un maneho di impuesto riba término di medio plaso, IMF ta pensa.

Ekonomia

Segun IMF ekonomia di Kòrsou a krese na 2021 ku 4,2 porshento i segun kálkulo e kresementu na 2022 tabata asta 6,5 porshento. Pa e añanan benidero ta spera un kresementu moderá di masoménos tres porshento den tantu 2023 komo 2024.

Tambe tin bon notisia riba tereno di inflashon, ku segun kálkulo lo redusí di 3,7 porshento na 2023 te un promedio di dos porshentu riba temino di medio plaso.

Riba tereno di finansas di gobièrnu a logra progreso supstansial e dos añanan ku a pasa. E saldo presupuestario ta mustra un saldo positivo di kasi mei porshento di e Produkto Nashonal Bruto (bbp) na 2022, lokual ta un mehorashon konsiderabel kompará ku e défisit di 1,6 porshento na 2019. Segun e ministerio di Finansas di Kòrsou e mehorashon aki ta debí spesialmente na un mihó atministrashon di impuesto i un kobransa mas efisiente di impuestonan atrasá.

Pa sigui oumentá e kresementu ekonómiko, ta importante pa invertí den gastunan di kalidat haltu ku ta stimulá e kresementu. IMF ta asentuá tambe ku mester sigui mehorá atministrashon di impuesto, siguí pa un revishon di e maneho di impuesto.

Un aktualisashon ámplio di e aparato gubernamental ta tambe hopi importante pa mehorá efisiensia i kalidat di servisio públiko.

Ademas un aktualisashon general di e sektor di salubridat ta nesesario pa garantisá kontinuidat di servisionan di salubridat, restablesé e viabilidat finansiero i limitá e riesgonan finansiero.