Kralendijk, The Bottom, Saba, Oranjestad, St. Eustatius – Un estudio den kolaborashon nobo ta duna komprendementu nobo di kon dos espesie di bayena “minke” ta hasi uso di e awanan di laman Karibe i su bisiña osean Atlántiko durante nan siklo di bida.  E resultadonan ta duna kontribushon mas profundisá na e balor di konservashon i e importansia di e santuario marino Yarari relativamente nobo, di Hulanda. Dor di kombiná informashon sientífiko, siensia di siudadano i informashon públiko, e estudio akí ta duna informashon klave ku lo yuda e esfuersonan riba tereno di konservashon sigui pa dilanti.

Bayena “Minke” ta e tipo di mas chikitu di e grupo di “bayena grandi” i nan ta aparesé den tur e awanan rònt mundu.  Tin dos diferente espesie di bayena “minke”, e bayena “minke” komun, òf bayena “minke” di nort (“Balaenoptera acutorostrata”) i e bayena “minke” Antartiko, òf bayena ‘minke” di sùit (Balaenoptera bonaerensis). 

Santuario Yarari

Ta konosí ku bayena “minke” ta biaha pa distansianan largu, pa asina tur dos espesie bin hasi uso di e awanan kayente di laman Karibe pa duna lus i kuida yu durante e lunanan di wenter. Denter di e region di Karibe, tin algun área marino protehá, manera e Santuario Yarari pa Mamífero Marino i Tribon, ku ta inkluí e awanan teritorial rònt di Boneiru, Saba, ku Statia. Banda di duna protekshon vital na e ekosistema marino, a establesé Santuario Yarari pa yuda enfoká riba investigashon pa yega na komprendementu mas amplio di e siklo di bida i di e patronchi di migrashon di tantu e espesienan residente komo e espesienan migrante. Komprendiendo kon e espesienan akí ta biaha durante un aña i ta usa awanan di laman Karibe ta esensial pa bai diseñá plannan di konservashon efektivo pa den futuro.

Estudio nobo

Un estudio resien a trese un kantidat grandi di investigadó i grupo di konservashon huntu inkluso e Instituto di Siensia di Medio Ambiente di Universidat di Leiden i e fundashon Aruba Marine Mammal Foundation. E estudio akí a hasi revishon di literatura, siensia di siudadano i datonan sientífiko pa kompilá dato tokante sitio i dato temporal di tur dos espesie di bayena “minke”. Meta di e estudio tabata pa siña mas tokante kon e espesienan akí ta hasi uso di e Área Amplio di Karibe durante nan siklo di bida. 

Na total, a kolekshoná 130 fail ku dato, mayoria di nan ta di estudio sientífiko (100) i e sobrá ta di siensia di siudadano (30). Bayena “minke” ta remarkablemente kurioso, frekuentemente aserkando boto, loke ta hasi nan e espesie perfekto pa siudadanonan sientífiko por mira. Mehorashon di ekipo di kámara di siudadano, i subimentu di inisiativa pa graba i kompartí imágen di opservashon di biodiversidat riba ret di medionan sosial i di banko di datonan públiko, a kondusí na un oumento di reportahe di siensia di siudadano di tur espesie. 

Resultadonan

E estudio akí a logra hasi investigashon di failnan tokante e espesienan, ku ta plamá na diferente parti, pa por haña mihó noshon ku ta indiká e importansia di Santuario Yarari ku ta situá den sentro di un área na Ost Karibe kaminda ku e bayena “minke” komun ta pasa wenter i pues ta kontribuí na balor i importansia di e santuario marino relativamente nobo akí, ku ta den área di Reino Hulandes. E informashon nobo akí ta bini di gran parti di dos estudio anterior, ku Universidat & Research di Wageningen a hasi huntu ku e Unidat di Maneho di Saba Bank, ku fondo generoso di Ministerio di Agrikultura, Naturalesa i Kalidat di Kuminda (LNV). A pone e resultadonan akí riba e mesun liña ku estudionan similar i a resultá ku nan ta kuadra ku e rutanan di migrashon na eskala grandi pa temporada di aña di e bayenanan “minke”. Un aspekto interesante ta, ku e estudio akí a suprayá ta, ku maske ku anteriormente tabatin e kerensia ku ta solamente e bayena “minke” di nort tabata hasi uso di Golfo di México, a haña kasonan ku ta konfirmá insidentenan di subimentu di tera di tur dos espesie. Ademas, e echo ku ku tabatin kaso di subimentu di tera di bayena “minke” hinter aña largu, ta sugirí ku tin bayena ta keda hinter aña denter di e teritorio di Golfo di México.

Registrá bo enkuentronan

Kada opservashon por duna informashon di dato útil ku por kontribuí na e noshon nesesario pa protehá e espesienan akí. Yuda pa desaroyá e esfuersonan di konservashon dor di registrá bo opservashon di bayena (minke) òf otro espesie i pòrtrètnan riba e wèpsait di Observation.org òf instalá e app grátis (iPhone (iObs) & Android (ObsMapp)). E hèrmèntnan akí ta disponibel na mas ku 40 idioma i tantu biólogo, komo siudadano ku turista por usa nan.

Pa mas informashon por haña e vershon kompleto di e rapòrt riba Dutch Caribbean Biodiversity Database

---

Also read

• 
  OLB ta kuminsá eksplorá snèk saludabel pa mucha na Kolegio San Luis Bertran
• 
  No tin sufisiente klaridat ainda di ‘promé stapnan’ na lèntfel Boneiru despues di intervenshon di Hulanda
• 
  Tourism Corporation Boneiru satisfecho ku partisipashon na DEMA Diveshow
• 
  Subway Boneiru a habri bèk despues di renobashon
• 
  Prosedura pa mèldu negoshi di hóreka i negoshi di konstrukshon a kuminsá ofisialmente