KRALENDIJK – Por ripará ku na Boneiru ta mas i mas difisil pa yena outo ku gasoline den oranan di anochi, ora e kaha di e pompstashonnan ya ta será. Esaki pa motibu ku kasi nunka e mashinnan outopomp di MCB ta traha manera nan ta supose di traha.

Pa hopi tempu e mashin tabata for di servisio na Gas Express. Aktualmente e mashin ta parse di ta traha, pero na momentu ku ta yena e number di e pòmp e mashin ta saka un mensahe ku ta bisa ku e number no ta wòrdu rekonosé. 

Na Mentor e mashin tin hopi tempu for di servisio kaba. Ta parse ku no tin speransa ku esaki lo drecha bèk mirando ku a tapa esaki asta ku un saku di plestik. 

Manera ta e kaso ku hopi situashon na Boneiru, un pregunta klave lo ta ken ta tene bista riba e servisio ku e stashon di gasolinenan ta trese na Boneiru, kiko ta e ora di servisio ku esaki mester tin minimalmente, pero tambe ki servisionan mester ta optenibel. 

Karchi

Awendia rònt mundu ta normal ku por yega gasolina 24 ora pa dia usando un karchi di debito òf credit card, pero esaki no ta parse di ta e kaso na Boneiru. Lo ta bon pa departamentunan konserní di gobièrnu tuma nota di e situashon ku ta reinando aktualmente.