KRALENDIJK – E infrastruktura di deporte na Boneiru ta sigui desaroyá den tempu rápido. Gobièrnu lokal i e organisashon di deporte Indebon tin plannan ambisioso pa ámplia fasilidatnan di deporte den diferente bario. Meta di e ampliashon aki ta pa duna e komunidat mas akseso na deporte, promové un estilo di bida salú i sostené talentonan hóben.

Terrence de Jongh, hefe di e organisashon di deporte Indebon, ta kontentu ku e kresementu di infrastruktura di deporte. “Deporte ta un parti importante di bida na Boneiru i nos ke pa kada bario tin akseso na fasilidatnan kualitativo. Nos ta drechando awor e parke di hunga i tambe e fèltnan multifunshonal na e sentronan di bario. Ta esensial pa inspirá hóbennan i duna nan e rekursonan pa desaroyá nan mes den deporte,” segun De Jongh.

Plannan pa vários bario

Segun De Jongh e ámpliashon di fasilidatnan di deporte den diferente bario ta un adelanto grandi pa e isla. “Nos a konstatá ku tin un nesesidat kresiente di lokalidatnan di deporte moderno, spesialmente pa futbòl, basketbòl, tènis, landamentu i atletismo. Nos ta identifikando awor e sitionan den Rincon, Nort’i Saliña, Tera Kòrá i Antriol kaminda nos ke realisá felt- i sentronan di deporte nobo.”

E plannan nobo ta enserá tambe invershon den espasionan pa kambia paña, iluminashon i tribuna pa públiko, lokual no ta mehorá solamente e eksperensia pa e deportistanan, pero tambe pa famia- i fanátikonan ku ta asistí na e weganan. “Pa nos e eksperensia total ta konta, for di entrenamentu te na kompetensia,” De Jongh ta splika.

Deporte komo motor pa desaroyo sosial 

Banda di e bentahanan deportivo, Indebon ta spera ku e fasilidatnan nobo lo tin un efekto sosial riba e barionan. “Deporte ta trese hendenan huntu, ta promové disiplina i trabou den tim. Tresiendo posibilidatnan di deporte mas serka di e hendenan, nos ta spera di kontribuí tambe na bienestar i solidaridat den  komunidat,” De Jongh ta bisa.

Poniendo e plannan den marcha, Boneiru ta spera di krese den e añanan benidero bira un isla kaminda deporte ta aksesibel pa grandi i chikí. De Jongh ta finalisá: “Esaki ta solamente e komienso. Nos ta keda traha na un futuro kaminda deporte ta na alkanse pa tur hende na Boneiru.”