KRALENDIJK – Riba djárason 20 di sèptèmber 2023, a tuma lugá na Posada Para Mira na Rincon, un inisio festivo di un programa di interkambio organisá pa BES(t) 4 kids pa organisashonnan di akohida di mucha na Boneiru. 

Meta di e programa di ‘twinning’ ta pa hasi posibel pa e organisashonnan na Boneiru por interkambiá di konosementu i eksperensia ku organisashonnan for di Hulanda Oropeo (i vice vèrsa). Por ehèmpel, ora ta trata di un ambiente di wega di siña i hunga, i oferta di wega enfoká riba stimulá desaroyo di mucha, riba tereno di seguridat i salubridat, formashon di ekipo di kolega i otro tópiko ku ta di importansia pa e kalidat di akohida di mucha. 

E programa di interkambio ta organisá pa e programa BES(t) 4 kids, riba inisiativa di e organisashonnan di akohida di mucha di Boneiru i Hulanda Oropeo. E programa lo dura en todo kaso te ku desèmber 2024. 

Eksperensia positivo

Saba i Sint Eustatius ya kaba tin eksperensia ku un programa di ’twinning’ i e resultadonan ta bon. No solamente ta tremendo pa e organisashonnan i e empleadonan interkambiá konosementu i eksperensia, pero e programa tin tambe un impakto positivo i enorme riba e kalidat di akohida di mucha. BES(t) 4 kids ta deseá esaki tambe pa e muchanan na Boneiru.